İntel Hindistan üçün 115 dollarlıq kompüter hazırlayıb
IDG News-un məlumatına görə, İntel şirkəti İntel Atom prosessoru əssında nettop adlanan ucuz kompüter hazırlayıb. Kompüter Hindistanın sifarişi ilə hazırlanıb və internetin populyarlaşması üçün nəzərdə tutulub.
Qiyməti isə beş min hind rupisi – 115 dollar məbləğindədir.
Ehtimal olunur ki, kompüterin monitoru adi televizor, və ya digər ekranlı qurğular ola bilər. Hindistan hökuməti hesab edir ki, bu kompüter ölkədə internet istifadəçilərinin sayını artıra bilər.
Hazırda Hindistanda bir milyarddan çox əhali yaşasa da, internetə cəmi 4,6 mln. nəfər qoşulur. Hakimiyyətin hesablamalarına görə, 2012-ci ildə Hindistanın 100 mln. vətəndaşı internetə qoşulacaq.
Daha əvvəl Hindistanın təhsil naziri xəbər vermişdi ki, mühəndislər büdcəyə daha uyğun noutbuk qurmaq üzərində işləyirlər. Onun qiymətinin 100 dollar olacağı gözlənilir. Bu noutbuk da ölkədə internetin yayılması üçün nəzərdə tutulub.
Bundan əlavə, Hindistan alimləri internetə çıxış üçün az enerji sərf edən xüsusi qurğular hazırlayırlar. Onlar ucuz qiymətlə satılacaq və ölkə sakinlərinə internet vasitəsilə təhsil almağa yardım edəcəklər.
