SOSİAL MEDIA

ABŞ və Çin nümayəndə heyətləri arasında ticarət gərginliyi və “TikTok” tətbiqində Çin sərmayəsindən imtina etmək üçün yaxınlaşan son tarixlə bağlı bazar ertəsi Madriddə danışıqların ikinci gün davam edəcəyi gözlənilir.

Xeberler.az Reutersə istinadən məlumat verir ki, danışıqların son dörd ayda dördüncü raundu bazar günü İspaniya Xarici İşlər Nazirliyində baş tutub və təxminən altı saat davam edib, amma heç bir nəticə əldə olunmayıb.

ABŞ hökumətinin sözçüsü danışıqlarda “TikTok”, tariflər və iqtisadiyyatın müzakirə edildiyini bildirib, lakin əlavə təfərrüatları açıqlamayıb.

ABŞ-ın maliyyə naziri Skott Bessent və Çin Baş nazirinin müavini He Lifenin başçılıq etdiyi nümayəndə heyətləri Prezident Donald Trampı Çin idxalına tarifləri artırmağa vadar edən fikir ayrılıqlarını həll etməyə çalışmaq üçün may ayından Avropa şəhərlərində görüşür. Bu vəziyyət Pekinin Amerika mallarına eyni dərəcədə yüksək tariflər tətbiq etməsi və nadir torpaq metallarının ABŞ-a daşınmasını dayandırması da daxil olmaqla cavab tədbirləri görməsinə səbəb olub.

Nümayəndə heyətləri sonuncu dəfə iyul ayında Stokholmda görüşüb, burada hər iki tərəfdən üçrəqəmli cavab tariflərini kəskin azaltmaq və Çindən ABŞ-a nadir torpaq metalları ixracının bərpasına səbəb olan ticarət barışığını 90 gün müddətinə uzatmaq barədə razılaşma əldə olunub.

Ekspertlər Madriddə ciddi nəticələrin olacağına o qədər də ümid etmirlər və ən yaxşı halda Çinin sosial şəbəkəsinin Birləşmiş Ştatlarda fəaliyyət müddətinin uzadılacağı ehtimalını irəli sürürlər. “TikTok”un çinli sahibi “ByteDance” ABŞ-da fəaliyyətini sentyabrın 17-dək dayandırmalıdır, əks halda, şirkət bu ölkədə birdəfəlik bağlanmağa məcbur olacaq.