SOSİAL MEDIA

"TikTok"un ABŞ əməliyyatlarının satışı üçün verilən müddət aprelin 5-də başa çatır və proqramın taleyi həmin tarixə qədər bəlli olmalıdır. Əks halda, sosial media proqramı ABŞ-da milli təhlükəsizlik səbəbi ilə qadağan oluna bilər.

Xeberler.az "The New York Times" istinadən məlumat verir ki, son dəqiqə təklifi "Amazon" şirkəti tərəfindən verilib. Texnologiya nəhəngi bütün "TikTok"u almaq təklifi ilə çıxış edib.

Prezident Donald Tramp proqramın taleyini müzakirə etmək üçün bu həftə rəsmilərlə görüşməyə hazırlaşır.

Bildirilib ki, ABŞ-ın vençur kapitalı şirkəti "Andreessen Horowitz", "TikTok"u almaqda maraqlı olan digər amerika investorlarını da daxil olduğu və "Oracle"ın rəhbərlik etdiyi təklif üzrə "TikTok"a investisiya etmək üçün danışıqlar aparır. Bu təklif aprelin 5-də başa çatacaq rəsmi müraciət müddəti ərəfəsində ən güclü variantlardan biridir.

Digər tərəfdən, keçən həftə özəl kapital şirkəti "Blackstone"dan da bir investisiya hərəkəti olub. "Blackstone" şirkəti, "ByteDance"ın mövcud qeyri-çinli investorları olan "Susquehanna International Group" və "General Atlantic" ilə birlikdə "TikTok"un ABŞ-dakı əməliyyatlarına sərmayə qoymağı planlaşdırır.

Qeyd edək ki, ötən həftə ABŞ prezidenti Donald Tramp Çinin "ByteDance" şirkəti ilə "TikTok"u satmaq üçün sövdələşmənin olacağı təqdirdə Çinə tətbiq edilən gömrük rüsumlarını azaltmağa hazır olduğunu açıqlamışdı.