Naxçıvanın Rabitə və Yeni Texnologiyalar Nazirliyi vətəndaşları xəbərdar edib

30-08-2019 / 13:31

Xeberler.az bildirir ki, gənclər arasında kifayət qədər populyarlıq qazanan FaceApp proqramının zərərli tərəfləri bir neçə müddətdir müzakirə olunur.

Proqramın kompüter və smartfonlarda şəxsi məlumatları ələ keçirməsi dünyanın əksər ölkələrində narahatlıq doğurub. Ayrı-ayrı ölkələrin aidiyyəti dövlət qurumları və qeyri-hökumət təşkilatları, o cümlədən araşdırma mərkəzləri ictimaiyyəti bu proqrama aludə olmamağa çağırıb.

Azərbaycanda da kompüter və smartfon istifadəçilərinin kifayət qədər olduğunu nəzərə alsaq, FaceApp proqramının zərərləri ilə bağlı rəsmi xəbərdarlıqların edilməsi gözlənilməz olmadı. Bu barədə Naxçıvan Muxtar Respublikasının Rabitə və Yeni Texnologiyalar Nazirliyi vətəndaşları xəbərdar etdi.

Nazirlik, ümumiyyətlə, kompüterə və ya smartfona yüklənən proqramlara, o cümlədən brauzerdəki genişləndirmələrə nəzər salmağı, istifadə edilməyən proqramları silməyi tövsiyə edir.

Bildirilib ki, müasir dövrdə texnologiya sahəsi sürətlə inkişaf etməkdədir. Yeni texnologiyaların işlənib hazırlanması və paralel olaraq kiberhücum metodlarının inkişaf etdirilməsi sistemlərinin təhlükəsizliyinin yüksək səviyyədə təmin edilməsi zərurətini yaradır.

Qeyd olunub ki, ideal təhlükəsizlik anlayışı yoxdur və faktiki olaraq hazırda qlobal məkanda təhdidlər kifayət qədər genişdir: "Məhz bu faktorları əsas götürdükdə mühitin təhlükəsizliyinin çoxpilləli mexanizm əsasında qurulması ən düzgün seçimdir".

"Müasir dövrdə gənclər internet şəbəkələrində yayılan oyunların və digər əyləncəli proqramların təhlükələrini nəzərə almırlar. Son zamanlar gənclərin sevimlisi olan şəkilləri qocaldan FaceApp mobil proqramı bu günlərdə sosial şəbəkələrdə, eləcə də AppStore və Google Play-də ən populyar proqramlardan biridir. Təkcə Google Play-də bu proqramı 50 milyondan çox istifadəçi yükləyib. Bu proqram insanları əyləndirir, istifadəçilərə yaşlananda necə olacaqlarını görmək imkanı verir və bu zaman real görüntülər yaradaraq milyonlarla insanın marağına səbəb olur. Populyarlığın əsas səbəbi də budur", - deyə məlumatda bildirilib.                          

Vurğulanıb ki, insanların fotolarını qocaldan FaceApp proqramı istifadəçilərin məxfi məlumatlarını üzə çıxarır: "Proqram istifadəçilər üçün risklidir. FaceApp istifadəçinin xəbəri olmadan albomlardakı hər hansı bir fotoşəkildən istifadə edə bilər. Fotoşəkil və digər məlumatlarını paylaşan istifadəçi rəqəmsal olaraq müdafiəsiz qalmaq təhlükəsi yaşayır. Proqram yükləndiyi cihazlar vasitəsilə məlumat toplayır. Təbii ki, istifadəçini üzdən tanıyır, onun İP ünvanını və yüklədiyi digər proqlamları bilir. Yəni özü üçün həmin istifadəçinin profilini formalaşdırır. Şəxsə aid informasiyaların başına nə gələcəyini, onların kimin əlinə keçə biləcəyini isə yalnız proqramın yaradıcıları bilir".         

Bu mənada ABŞ Senatında demokratların lideri Çak Şumer iddia edib ki, FaceApp tətbiqi insanların məlumatlarını üçüncü tərəfə satır.

Proqramın yaradıcısı Yaroslav Qonçarov isə məlumatların üçüncü tərəfə ötürülməsi ilə bağlı informasiyaların yanlış olduğunu deyib. O bilirib ki, məlumatların üçüncü tərəfə ötürülməsi müzakirə mövzusu deyil: "FaceApp üzərində iş görülən fotoların böyük hissəsini "buludlar"da saxlayır. Biz sadəcə istifadəçinin redaktə üçün seçdiyi fotoları yükləyirik. Heç vaxt əlavə hansısa fotonu götürmürük. Yüklənən şəkillər isə 48 saat ərzində serverlərimizdən silinir".

İddiaların həqiqəti nə qədər əks etdirib-etdirməməsindən aslı olmayaraq FaceApp yaradıcılarının hansı mövqedən çıxış edəcəyini öncədən proqnozlaşdırmaq olardı. Ortada sübut yoxdursa, ictimaiyyəti yalnız təhlükədən xəbərdar etməklə potensial təhdidlərdən sığortalamaq olar. Son qərar isə kompüter və smartfon istifadəçilərinin üzərinə düşür. Lakin qərar verməzdən qabaq bir daha düşünməkdə fayda var.


ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.