TƏHLÜKƏSİZLİK

Ötən il ərzində dövlət qurumlarının şəbəkələrinə yönəlmiş təqribən 450 milyondan çox zərərli sorğunun “AzStateNet” şəbəkəsi üzrə qarşısı alınıb.

Xeberler.az məlumat verir ki, bunu Xüsusi Rabitə və İnformasiya Təhlükəsizliyi Dövlət Xidmətinin (XRİTDX) İdarə rəisi Nadir Novruzov bildirib.

Onun sözlərinə görə, mərkəzləşdirilmiş “firewall” və təmizlənmiş internet infrastrukturu vasitəsilə dövlət qurumlarına yalnız filtrdən keçmiş trafik ötürülür.

““Sandbox” mühafizə sistemi tərəfindən zərərverici tərkibli sənədlər kimi 96 min subyekt aşkarlanaraq zərərsizləşdirilib, istifadəçilərin təhlükəsizliyinin təmin olunması məqsədilə xidmət tərəfindən 93 dövlət qurumunu əhatə edən, ümumilikdə 55 min istifadəçi üçün mərkəzləşdirilmiş antivirus lisenziyası təqdim edilib. Həmin sistem vasitəsilə 2025-ci il ərzində 6 milyon 205 min 200 zərərli aktivliyin qarşısı alınıb ki, bu da 2024-cü illə müqayisədə təxminən 50,8 faiz azalma deməkdir.

Dövlət informasiya sistemlərində aparılan audit və texniki yoxlamalar nəticəsində 2025-ci ildə 1200-dən çox təhlükəsizlik boşluğu aşkarlandığını vurğulayan N.Novruzov dövlət qurumlarına aid sistemlər üzrə 1264 boşluq qeydə alındığını sözlərinə əlavə edib: “Ötən il aprel-iyun aylarında aşkarlanma sayında artım “Qarabug” platforması ilə birgə icra edilən “Bug Bounty” proqramı ilə bağlı olub. Aşkarlanan boşluqların bir hissəsi milli boşluqlar bazasına, bir hissəsi isə beynəlxalq platformalara təqdim olunaraq CVE kodları əldə edilib. Bu yanaşma dövlət sistemlərində təhlükəsizlik səviyyəsinin yüksəldilməsinə xidmət edir”.