EDUTECH

Məlumat verdiyimiz kimi, dövlət başçısı İlham Əliyev “Dövlət hakimiyyəti orqanlarında, idarə, təşkilat və müəssisələrində kargüzarlığın aparılmasına dair Təlimat”ın təsdiq edilməsi haqqında” 2003-cü il 27 sentyabr tarixli 935 nömrəli Fərmana dəyişiklik edib. Təlimata olan əsas əlavə isə “Elektron sənədlərlə bağlı kargüzarlığın aparılmasının xüsusiyyətləri” adlı tamamilə yeni  bölmədən ibarətdir.

Bu qanun eyni zamanda təhsil müəssisələrinin fəaliyyətinə də aiddir. Təlimata əsasən, təhsil müəssisələri bir-biri ilə infomasiya əlaqələrini artıq elektron formada da həyata keçirə bilər.

Araşdırmalarımızdan da məlumdur ki, Təhsil Nazirliyi təhsil sistemində elektron imza və elektron sənəd dövriyyəsi mexanizmlərindən kifayət qədər istifadə edir.

Xeberler.az olaraq məktəblər arasında və məktəblərin  Bakı Şəhəri üzrə Təhsil İdarəsi və Təhsil Nazirliyi ilə informasiya münasibətlərinin, sənəd dövriyyəsini necə qurulması ilə bağlı Təhsil Nazirliyinə sualla müraciət etdik.

Nazirlikdən bildirildi ki, Təhsil Nazirliyi, Bakı Şəhəri üzrə Təhsil İdarəsi (BŞTİ) və məktəblər arasında qarşılıqlı sənəd dövriyyəsi “Dövlət orqanlarında, dövlət mülkiyyətində olan və paylarının (səhmlərinin) nəzarət zərfi dövlətə məxsus olan hüquqi şəxslərdə və büdcə təşkilatlarında kargüzarlığın aparılmasına dair Təlimat”da nəzərdə tutulmuş qaydada həyata keçirilir.

Sənədlərin tərtibi, qeydiyyatı və kargüzarlıq işinin aparılmasında Təlimatın müddəaları rəhbər tutulur.

Təhsil Nazirliyindən o da qeyd edilib ki, Azərbaycan Respublikası Təhsil Nazirliyi və Koreya Respublikasının Beynəlxalq İnkişaf Agentliyi (KOICA) arasında “Müəllimlərin peşəkarlıq səviyyəsinin artırılması və Azərbaycan Təhsil Nazirliyi üçün sənəd dövriyyəsi” layihəsinin icrası istiqamətində işlər həyata keçirilir. Aparılan işlər yekunlaşdıqdan sonra informasiya mübadiləsinin təmin olunması məqsədi ilə ilk mərhələdə Təhsil Nazirliyi və Bakı Şəhəri üzrə Təhsil İdarəsi, daha sonra isə digər təhsil müəssisələri arasında elektron sənəd dövriyyəsi fəaliyyət göstərəcək.

Ruhəngiz Muradova