RƏQƏMSAL DÜNYA

1915-ci il hadisələrinə görə ermənilərdən üzr istənilməsi ilə bağlı başlanan internet-kampaniyaya qarşı əks-kampaniyaların dairəsi genişlənir. APA-nın məlumatına görə, bu gün ermənilərdən üzr istənilməsinin yolverilməz olduğunu düşünən insanlar daha bir internet kampaniyaya başlayıblar. www.ozurdilemiyoruz.biz saytında başlayan kampaniyaya qoşulanlar arasında bir çox məhşur şəxslər də var.

Saytdakı “Tarix yaşanmış, yazılmış və hökmünü vermişdir. Ortada utanacağımız bir günah və adına üzr istəyəcəyimiz bir günahkar yoxdur. Bu iyrənc kampaniyaya başlamaq cəsarəti tapanlar, ziyalı adının arxasında gizlənərək heç kəsin Türk millətinin adından danışa bilməyəcəyini və Türk millətini mühakimə edə bilməyəcklərini anlamalıdır” sözlərinin altına imza atanlar arasında sənətçi Əhməd Şəfəq, Ozan Arif, CHP və MHP millət vəkilləri, Böyük Birlik Partiyasının sədri, millət vəkili Mühsin Yazıçıoğlu, çoxlu sayda jurnalist də var. Kampaniyaya Azərbaycandan qoşulma səviyyəsi də çox yüksəkdir. Türkiyədə yaşayan ermənipərəstlərin iyrənc kampaniyasına “yox” demək istəyənlər www. ozurdilemiyoruz.biz saytına daxil olaraq imza ata bilərlər.

Qeyd edək ki, dünən səhər saatlarında www.ozurbekliyoruz.com saytında başlayan kampaniya da davam edir. Bu kampaniyada da dünyanın bir çox yerlərində yaşayan azərbaycanlılar aktiv iştirak edirlər. Ermənilərin türk xalqından üzr istəməsi tələbi ilə başlayan imzatoplama kampaniyasına artıq on minlərlə insan qoşulub. Kampaniya davam edir.