E - HÖKUMƏT

Cari ilin 14-16 sentyabr tarixlərində Rusiya Federasiyasının Sankt-Peterburq şəhərində bu ölkənin Rabitə və Kütləvi Kommunikasiyalar Nazirliyinin təşkilatçılığı ilə açıq açar infrastrukturu (PKI) və elektron imza mövzularına həsr edilmiş  XIV Beynəlxalq PKI Forumu keçirilir.

Builki forumun əsas işçi mövzuları açıq açar infrastrukturuna etimad, PKI infrastrukturunda perspektivli texnologiyaların tətbiqi, PKI və elektron imza sahəsində standartlaşdırma, sertifikasiya mərkəzlərinin fəaliyyəti, elektron imza texnologiyalarının qarşılıqlı əlaqəsi və s. ibarətdir. Ümumilikdə tədbirdə Belarus, Qazaxstan, Azərbaycan, Polşa, Rusiya Federasiyası, Özbəkistan və digər ölkələrdən 300-dən artıq nümayəndə iştirak edir.

Xeberler.az-ın məlumatına görə, forumda ilk dəfə olaraq “Asan İmza” mobil elektron imza xidmətinin yaradıcısı və operatoru olan B.EST Solutions şirkətinin təsisçisi Yana Krimpe də iştirak edir. Tədbir zamanı baş tutacaq mobil identitet və PKI mövzusunda çıxışında Y.Krimpe açıq açar infrastrukturu əsasında fəaliyyət göstərən “Asan İmza” texnologiyası haqda ətraflı məlumat verəcək, Azərbaycanda “Asan İmza” texnologiyasının elektron hökumətdən mobil hökumətə keçid prosesində tətbiqi barədə danışacaq.

“Asan İmza” texnologiyası bütün dövlət və özəl elektron xidmətlərə məhdudiyyətsiz giriş imkanı təmin edir və qanunvericilik baxımından elektron mühitdə ümummilli vətəndaş pasportu ilə bərabər hüquqlar təqdim edir.  Elektron xidmət təminatçıları üçün tətbiqinin asanlığı və əhali üçün kütləvi istifadə baxımından əlçatan olması kimi üstünlüklərə görə “Asan İmza” texnologiyası hazırda Azərbaycanda vətəndaşlar və sahibkarlar arasında artan populyarlığa malikdir və mobil hökumətin başlıca komponentini təşkil edir.

Çıxış zamanı tədbir iştirakçılarına Azərbaycan Vergilər Nazirliyinin, Dövlət Gömrük Komitəsinin, Əmək və Əhalinin Sosial Müdafiəsi Nazirliyinin, Elektron Hökumət və  “Asan Ödəniş” portallarının, eləcə də maliyyə sektorunun “Asan İmza” ilə mümkün olan innovativ elektron xidmətləri təqdim ediləcək.

Qeyd etmək lazımdır ki, cəlbedici ixrac potensialına malik olan “Asan İmza” texnologiyası mütəmadi olaraq bu kimi müxtəlif beynəlxalq sahəvi tədbirlərdə “Made in Azerbaijan” şüarı altında təmsil edilir. B.EST Solutions şirkəti qabaqcıl mobil identitet və imza texnologiyasının tətbiqi və istifadəsi, eləcə də mobil imza xidmətinin dövlət və özəl elektron sistemlərlə qarşılıqlı əlaqəsi sahəsində Azərbaycanın əldə etdiyi nailiyyətlərin təqdim edilməsi məqsədilə bu kimi beynəlxalq tədbirlərdə fəal iştirak edir. 

“Asan İmza” Azərbaycanda vahid elektron hökumət konsepsiyasının mühüm komponentini təşkil etməklə yanaşı, özəl sektorun elektron xidmətlərinin göstərilməsində də istifadə olunur. Hazırda ölkədə bir çox banklar, sığorta şirkətləri, onlayn ödəniş portalları öz elektron sistemlərində mobil imza xidmətindən fəal şəkildə yararlanır.

Məltəm Talıbzadə