TƏDBİRLƏR

Fevralın 6-7-si tarixlərində Azərbaycan vətəndaşları tərəfindən Türkiyədə baş vermiş zəlzələdən əziyyət çəkən insanlara Rəqəmsal İnkişaf və Nəqliyyat Nazirliyi tabeliyində olan “Azərpoçt” MMC üzərindən beynəlxalq pulköçürmələri sistemləri vasitəsilə 255 min ABŞ dolları məbləğində vəsait göndərilib.

Bu barədə Xeberler.az-a Nazirlikdən məlumat verilib.

Bildirilir ki, bu gündən adıçəkilən qurumun bütün ölkə üzrə poçt şöbələrində yardımların qəbuluna və göndərilməsinə başlanılır.

Göndərişlərə görə heç bir xidmət haqqı alınmır. Bununla belə bağlamaların qəbulu və qablaşdırılması adi poçt göndərişi qaydasında həyata keçirilir, yəni göndərilən mallar vətəndaşın iştirakı ilə siyahıya alınır və qablaşdırılır.

Vətəndaşlardan yardımların hazırlanması zamanı Türkiyə Daxili İşlər Nazirliyinin Təbii Fəlakət və Fövqəladə Hallar Agentliyinin (AFAD) qoyduğu tələblərə riayət etmələri xahiş olunur. Qeyd olunur ki, istifadə olunmuş geyimlər və əşyalar gigiyenik şərtlər və epidemiya riski baxımından qəbul olunmur.

Bundan əlavə, tez xarab olan və daşınması mümkün olmayan məhsullar göndəriş üçün qəbul edilmir.

Nazirlik yardım məqsədilə aşağıdakı geyim və əşyaların göndərilməsi tövsiyə edir:

Geyimlər: palto, plaş, papaq, şərf, əlcək, qış ayaqqabıları, isti üst geyimləri, alt paltarları

Digər əşyalar: çadır, döşək, yorğan, yastıq, termos, uşaq bezləri, əl fənəri, generator.