TEXNOLOGİYA

“Meta” şirkəti 6 yanvar 2021-ci ildə Kapitoliyə hücumdan sonra hesablarını dayandırdığı Prezident Donald Trampın şirkətə qarşı açdığı məhkəmə iddiasını həll etmək üçün 25 milyon dollar təzminat ödəməyə razı olub. Bu barədə məsələ ilə yaxından tanış olan üç mənbə məlumat verib.

Xeberler.az xarici mediaya istinadən məlumat verir ki, bu, böyük korporasiyanın Prezidentlə hüquqi mübahisəni həll etməsi ilə bağlı ən son hadisədir, habelə “Meta” və onun baş direktoru Mark Zukerberqin ABŞ-ın yeni administrasiyasından dəstək almağa çalışan digər böyük texnologiya şirkətlərinə qoşulduğu bir vaxta təsadüf edir.

Müqavilənin şərtlərinə Trampın gələcək prezidentlik kitabxanası kimi xidmət edəcək qeyri-kommersiya təşkilatına veriləcək 22 milyon dollar daxildir. Qalan məbləğ hüquqi xidmətlərin ödənilməsinə və digər məhkəmə proseslərinə yönəldiləcək”, -deyə məlumatda bildirilir.

Keçən ay “ABC News” telekanalı 15 milyon dollar ödəməyə və Donald Trampın aparıcı Corc Stefanopulosa qarşı açdığı böhtan iddiasını həll etmək üçün ictimaiyyətdən üzr istəməyə razılaşıb.

Trampın “CBS News” telekanalına qarşı iddiası hələ də davam edir. Siyasətçi bu prosesdə Kamala Harrisin “60 Dəqiqə” verilişinə müsahibəsinin redaktəsi ilə bağlı seçkiyə müdaxilə iddiası ilə əlaqədar 10 milyard dollar tələb edir.

Mark Zukerberqin vəkili “tərəflər iddiaçıların fərdi iddialarını həll etmək və bu məsələnin nizamlanmasına nail olmaq üçün razılığa gəliblər” desə də, razılaşmanın təfərrüatlarını açıqlamayıb. 2021-ci ilin iyulunda Donald Tramp “Meta” (o vaxtlar “Facebook” kimi tanınırdı), “Twitter” (indiki “X” sosial şəbəkəsi) və “Google”a qarşı məhkəmə iddiası qaldırdı, çünki bu internet nəhəngləri onun platformalarında hesablarına girişi dayandırmışdı. Tramp bu cür hərəkətlərin Konstitusiyaya zidd olduğunu və Birinci Düzəliş hüquqlarını pozduğunu iddia etmişdi. Bu kontekstdə Birinci Düzəliş hökumətin söz azadlığına məhdudiyyətlərinin qarşısını alır və özəl biznesə şamil edilmir.