Azərbaycan nümayəndə heyəti TurkmenTel-2010 sərgi-konfransında iştirak edəcək

15-09-2010 06:09

Rabitə və informasiya texnologiyaları nazirinin müavini Elmir Vəlizadənin rəhbərliyi altında Azərbaycan nümayəndə heyəti 15-17 sentyabr tarixlərində Aşxabad şəhərində keçiriləcək TurkmenTel-2010 – IV Beynəlxalq telekommunikasiya, telemetriya, informasiya texnologiyaları və teleradioyayım avadanlığı sərgisi və “Türkmənistan və dünya informasiya-telekommunikasiya texnologiyaları” elmi konfransında iştirak edəcək.

Nümayəndə heyətinin tərkibinə Rabitə və İnformasiya Texnologiyaları Nazirliyinin əməkdaşları ilə yanaşı Azərbaycanın özəl İKT şirkətlərinin nümayəndələri də daxil ediləcək. Sərgidə Azərbaycanın milli pavilyonunun təqdim olunacağı nəzərdə tutulub. Burada respublikanın informasiya texnologiyaları sahəsində ən son nailiyyətləri nümayiş etdiriləcək.

Müxtəlif ölkələrdən 300-dək nümayəndə qatılacaq “Türkmənistan və dünya informasiya-telekommunikasiya texnologiyaları” elmi konfransında xarici investisiyalar, eləcə də həm Türkmənistan, həm də bütün regionun İKT sektorunun inkişafı üçün hökumətlərarası əməkdaşlıq və imkanlar müzakirə olunacaq. Konfransda Elmir Vəlizadənin Azərbaycanda informasiya-kommunikasiya texnologiyalarının inkişafı, həmçinin ölkədə bu istiqamətdə həyata keçirilən layihələrə dair çıxışı gözlənilir.

Türkmənistan Rabitə Nazirliyi və Ticarət-Sənaye Palatasının təşkil etdiyi tədbirdə telekommunikasiya, informasiya texnologiyaları, telemetriya və ölçü cihazları, simsiz rabitə, peşəkar audio-video avadanlıqları, teleradio yayım avadanlıqları, kabel rabitə məhsulları və elementləri, rabitə sahəsində müxtəlif xidmətlər göstərən operatorlar, nəqliyyat, xüsusi texnika və avadanlıq və logistika bölmələri təqdim olunub.

ŞƏRHLƏR