TƏDBİRLƏR

Bu gün Bakıda XIV Beynəlxalq telekommunikasiya və informasiya texnologiyaları sərgi və konfransı (Bakutel 2008) öz işinə başlayır.
İnformasiya texnologiyaları sahəsində regionun ən iri sərgisi olan bu tədbir Azərbaycan Prezidenti İlham Əliyevin himayəsi altında və Azərbaycan Rabitə və İnformasiya Texnologiyaları Nazirliyi, Beynəlxalq Telekommunikasiya İttifaqı, Regional Rabitə Birliyi, Azərbaycanda İxracatın və İnvestisiyaların Təşviqi Fondunun dəstəyi ilə keçirilir. 
Ümumilikdə bu ilki sərgidə 21 ölkədən 100-dən çox şirkət iştirak edəcək. Tədbirdə təmsil olunan iştirakçıların 40%-dən çoxu isə yerli şirkətlər olacaq. Sərgidə telekommunikasiya və şəbəkələr, genişzolaqlı rabitə və texnologiyalar, kabel və simsiz rabitə, peyk rabitəsi və texnologiyalar, teleradio yayım avadanlığı və texnologiyaları, proqram təminatı və avtomatlaşdırılma sistemləri, bank texnologiyaları və xidmətləri və digər bölmələrin təqdim olunması nəzərdə tutulub.
Bu ilki sərgidə peyk rabitəsi sektoruna daha yüksək diqqət veriləcək. Belə ki bu istiqamətdə sərgidə ayrıca peyk texnikası bölməsi təqdim olunacaq.
Bundan əlavə tədbir çərçivəsində Bakıda rabitə və informasiya texnologiyaları sahəsinin nazirlərinin regional görüşü keçiriləcək. Görüşün məqsədi 20 ölkəni birləşdirəcək Trans-Avrasiya super informasiya magistralının yaradılmasına dair layihənin müzakirəsidir. Qeyd edək ki həmin magistralın yaradılması ideyası Azərbaycana məxsusdur.
Sərgi zamanı “Azərbaycan – İsrail”, “Azərbaycan - Estoniya” İKT seminarlarının və “Kaliforniya İKT missiyasının görüşü”nün keçiriləcəyi planlaşdırılıb.
Bakutel 2008 noyabr ayının 14-dək davam edəcək.
Mənbə: mincom.gov.az