EDUTECH

İnnovasiya və Rəqəmsal İnkişaf Agentliyinin (İRİA) təşkil etdiyi “Technest” Təqaüd Proqramı yeni tədris ilinə start verib.

Agentlikdən Xeberler.az-a bildirilib ki, tədris ili çərçivəsində Bakı şəhəri üzrə 2-ci qeydiyyat dalğası elan edilib. Qeydiyyat ölkənin İKT sahəsində 10-dan çox aparıcı tədris mərkəzinin təqdim etdiyi 50-yə yaxın ixtisas üzrə aparılacaq. Proqram üzrə 2023-cü ilin ilk rübündə 1000-dən çox, il ərzində ümumilikdə isə Azərbaycan üzrə 3000 nəfərə təqaüdün verilməsi planlaşdırılır.

Qeydiyyatdan keçən şəxslər müsabiqə mərhələlərindən sonra təqaüdə cəlb olunacaq və göstəricilərindən asılı olaraq təqaüd qazanan şəxslərin təhsil haqqlarının 70, 90 və 100 faizi “Technest” tərəfindən təmin ediləcək.

Qeyd edək ki, 2-ci mərhələdə qeydiyyat yeni tərəfdaşların təklif etdiyi ixtisaslar üzrə aparılacaq. Qeydiyyat və ixtisaslarla bağlı ətrafı məlumat əldə etmək üçün qeyd olunan linkə daxil ola bilərsiniz: (https://technest.idda.az/) .

Son qeydiyyat tarixi fevralın 10-dur.

Xatırladaq ki, “Technest” Təqaüd Proqramı çərçivəsində İRİA İKT sahəsində tədris prosesinin peşəkar və səmərəli təşkilini həyata keçirir. Hər kəs üçün əlçatan təhsil imkanı yaradan proqramdan 12 yaşdan yuxarı Azərbaycan vətəndaşları faydalana bilər. Proqram çərçivəsində İKT üzrə ixtisalaşmış 12 aparıcı təlim mərkəzi ilə 50-yə yaxın ixtisasın tədrisi həyata keçirilir. 2022-ci il üzrə “Technest” Təqaüd Proqramı çərçivəsində təqaüd qazanan şəxslərin sayı 618, işəqəbul əmsalı 90 faiz təşkil edir.