“Azərbaycanda internet qiymətlərinin yenidən endirilməsi məsələsinə baxıla bilər”

14-01-2009 / 17:37

Azərbaycanda gələcəkdə internet-xidmətlərin qiymətlərinin endirilməsinə dair məsələyə baxıla bilər. Bu bərədə çərşənbə günü jurnalistlərə rabitə və informasiya texnologiyaları naziri Əli Abbasov bildirib.

“Son araşdırmalarımız göstərir ki, Azərbaycanda internetin geniş yayılması üçün qiymətlər yenidən aşağı salınmalıdır. Müvafiq təhlillər aparılıb və hesab edirəm ki, yaxın gələcəkdə biz bu məsələni müzakirə edəcəyik”, - deyə nazir qeyd edib.
Onun sözlərinə görə, məlum olduğu kimi, cari ildə, Azərbaycanın bir çox provayderi “ölkədə internetin qiymətlərini 50-60% endiriblər”. Ə.Abbasov həmçinin vurğulayıb ki, yanvar ayının 15-dən başlamalı olan internetin qiymətlərinin enmə prosesi “dərhal yanvar ayının 15-dən deyil, bir qədər gecikə bilər, bu səbəbdən ki, enmə prosesi kiçik provayderlərə neqativ təsir göstərə bilər”.

Azərbaycan Respublikası Tarif (qiymət) Şurasının 30 dekabr 2008-ci il tarixli qərarına əsasən fiziki xətlə telefonlaşdırılması mümkün olmayan ərazilərdə yerləşən təhsil müəssisələri üçün “Teleradio” İstehsalat Birliyinə məxsus bina, sahə və qüllələrdə kənar təşkilatların avadanlıqlarının yerləşdirilməsi və xidmət göstərilməsinə görə aylıq tariflərə 80% güzəşt tətbiq olunacaq. Həmin qərara müvafiq olaraq, avadanlıqlara görə tətbiq olunan tariflər 0,54 manatdan 53,6 manatadək (ƏDV-siz), anten sistemlərinə görə tətbiq edilən tariflər isə 2 manatdan 105 manatadək (ƏDV-siz) səviyyəsində təsdiq olunub.
Şurada qəbul olunmuş digər qərara uyğun olaraq 2 Mbit/san şəhərdaxili rəqəmsal kanalların (portların) istifadəyə verilməsi tarifləri digər abonentlər (büdcə təşkilatları istisna olmaqla) üçün 1200 manatdan 600 manata (50%), onlardan aylıq istifadə tarifləri isə 320 manatdan 300 manata (6,3%), rəqəmsal rabitə kanallarının qoşulma və aylıq istifadə (Bakı şəhəri istisna olmaqla) tarifləri 240 manatdan 200 manata, hər tam və natamam 50 km məsafəyə görə 2 Mbit/san tutumundan istifadə tarifləri isə 180 manatdan 150 manata (16,7%) endirilib.

Belə vəziyyətdə internet provayderləri xidmətlərinin maya dəyərinin azalmasına, nəticə etibarilə son istifadəçilər üçün internet xidməti tariflərinin ən azı 15-20% aşağı salınmasına imkan yaradacaq.

Yeni tariflər 2009-cu ilin 15 yanvar tarixindən qüvvəyə minəcək.


ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.