TƏHLİL

Azərbaycanda internet xidmətlərinə dair tariflərin endirilməsi davam edir. Belə ki, bir sıra provayerlər bu ayın əvvəlindən etibarən yenidən öz xidmətlərinin qiymətlərini endiriblər. Bu haqda Rabitə və İnformasiya Texnologiyaları Nazirliyindən bildiriblər.İnternet tarif planlarında mütəmadi olaraq endirim edən şirkətlətə misal olaraq Uninet, Connect, Ultel, Intrans, və Azeuroteli qeyd etmək olar. Qeyd edək ki, bundan əvvəl fevral ayının əvvəlində provayderlər tərəfindən tariflər artıq endirilmişdir.

Tariflərin endirilməsi Tarif (qiymət) Şurasının müvafiq qərarından sonra mümkün olub. Həmin qərara yanvar ayının 15-dən etibarən, 2 Mbit/san şəhərdaxili rəqəmsal kanalların (portların) istifadəyə verilməsi tarifləri digər abonentlər (büdcə təşkilatları istisna olmaqla) üçün 1200 manatdan 600 manata (50%), onlardan aylıq istifadə tarifləri isə 320 manatdan 300 manata (6,3%), rəqəmsal rabitə kanallarının qoşulma və aylıq istifadə (Bakı şəhəri istisna olmaqla) tarifləri 240 manatdan 200 manata, hər tam və natamam 50 km məsafəyə görə 2 Mbit/san tutumundan istifadə tarifləri isə 180 manatdan 150 manata (16,7%) endirilmişdir.
Bundan əlavə Azərbaycan Rabitə və İnformasiya Texnologiyaları Nazirliyinin “Aztelekom” və “Bakı Telefon Rabitəsi” İstehsalat Birlikləri tərəfindən internet provayderlərin ADSL xəttinə qoşulma haqqı 10 manatdan 5 manata, aylıq istifadə haqqı isə 4 manatdan 2 manata endirilmişdir.

Azərbaycanda İnternet axınının satışı ilə məşğul olan Delta Telecom şirkəti internet-provayderlər üçün qiymətlərin iki dəfə endirilməsi barədə elan etmişdir.

Bütün bu addımlar internet provayderlərin xidmətlərinin maya dəyərinin azalmasına, nəticə etibarilə son istifadəçilər üçün internet xidməti tariflərinin azalmasına imkan yaradır.

Qeyd etmək lazımdır ki, təkcə son 2 ay ərzində Azərbaycanda internet xidmətlərinə dair tariflərin iki dəfədən də artıq enməsi müşahidə olunur. Belə ki, ADSL texnologiyasına qoşulmaqla saniyədə 1 Mb sürətlə limitsiz internet xidmətlərinə görə aylıq ödəniş 60 manatdan 165 manatadək təşkil edir. Həmin paketin respublika üzrə orta qiyməti isə təxminən 130 manatdır.

Xatırladaq ki, Azərbaycanda internet xidmətlərinin təqdim olunması üçün xüsusi icazə (lisenziya) tələb olunmur və şirkətlər azad rəqabət qaydalarına uyğun olaraq göstərilən xidmətlərə dair tarifləri özləri endirirlər. Hazırda ölkədə 30-dan çox provayder şirkəti fəaliyyət göstərir.