İNNOVASİYA VƏ STARTAP

Yanvarın 24-də “Technovate-SABAH Mələk İnvestorlar Klubu”na üzv olan yerli mələk investorların iştirakı ilə 2024-cü ilin ilk tədbiri keçirilib və klub üzvlərinə investisiya etmələri üçün ilkin mərhələdə 3 qlobal startap təqdim olunub. 

“Technovate-SABAH Mələk İnvestorlar Klubu”nun həmtəsisçisi Fərid İsmayılzadə tədbirin bütün iştirakçılarını salamlayaraq Klub üzvlərinə bu istiqamətdə uğurlar arzulayıb və görülən işlərin Azərbaycanda startap ekosisteminin gələcək inkişafına böyük töhfələr verəcəyini vurğulayıb. 

Sonda yerli investorlar sözügedən üç qlobal startap haqqında Klubdaxili müzakirələr aparıb, öz fikirlərini və təcrübələrini bir-biri ilə bölüşüblər. Sözügedən startaplara sərmayə ilə bağlı müzakirələr Klub üzvləri arasında şənbə günü keçiriləcək ilk xüsusi səhər yeməyi görüşündə də davam edəcək. Bundan sonra yerli investorlar investisiya etməkdə maraqlı olduqları təqdirdə həmin qlobal startaplara  sərmayə qoyacaqlar.

Qeyd edək ki, hazırda “Technovate-SABAH Mələk İnvestorlar Klubu”na 124 yerli investor üzvdür və onlardan 109-u 6-8 dekabr tarixlərində keçirilmiş “Mələk İnvestorlar Məktəbi”nə qeydiyyatdan keçib və beynəlxalq ekspertlər tərəfindən keçirilmiş təlimlərə cəlb olunaraq mələk investisiyası sahəsində nəzəri və praktiki biliklərə yiyələniblər.

Cari il ərzində bu kimi görüşlərin davamlı olaraq keçirilməsi və Klubun üzvlərinə müxtəlif qlobal startapların təqdim olunması nəzərdə tutulur.

Həmçinin 2024-cü il ərzində Klub tərəfindən hər biri 100 nəfərdən ibarət olmaqla daha 2 qrupun “Mələk İnvestorlar Məktəbi”nə cəlb olunması və sonrakı mərhələdə Kluba üzv edilməsi planlaşdırılır. Klub ölkədə startap ekosisteminin inkişafında yerli mələk investorların rolunu artırmaq üçün cari ilin sonuna qədər üzvlərinin sayını 300-ə çatdıraraq onların aktiv şəkildə qlobal startaplara sərmayə qoymalarını hədəfləyir.