TƏHLİL

Bu gün Rəqəmsal İnkişaf və Nəqliyyat Naziri Rəşad Nəbiyev və "Mələk İnvestorlar Klubu" arasında görüş keçirilib.

Xeberler.az məlumat verir ki, bu barədə Azərbaycan İnternet Forumunun Prezidenti, ekspert Osman Gündüz öz Feysbuk səhifəsində paylaşım edib.

“Tədbirdə İnnovasiya və Rəqəmsal İnkişaf Agentliyi, yerli startap icması, innovasiya ekosisteminin tanınmış üzvləri, “Technovate – Sabah Mələk İnvestorlar Klubu”nun təsisçiləri və investorları, media nümayəndələri iştirak ediblər.

Görüşdə innovasiya və startap ekosisteminin cari durumu ilə bağlı geniş fikir mübadiləsi aparılıb.

Nazir Rəşad Nəbiyev “Technovate – Sabah Mələk İnvestorlar Klubu”nun yaradılması təşəbbüsünü alqışlayaraq klubun fəaliyyətinin innovasiya ekosistemi üçün böyük əhəmiyyət kəsb etdiyini vurğulayıb.

Klubun təsisçisi Fərid İsmayılzadə təqdimatla çıxış edərək vençur studiya və klubların yaradılması və dəstəklənməsinin əhəmiyyətini önə çəkib.

Görüş çox maraqlı və faydalı oldu.

Fikrimcə, ekosistemdə yeni bir oyunçunun, xüsusilə də investisiya yönümlü qurumun yaradılması olduqca əhəmiyyətlidir.

Əlbəttə, Azərbaycanda bir neçə dəfə belə cəhdlər olub, amma bildiyimiz kimi nəticəsi uğursuz olub.

Bu günkü görüşdən sonra bir qədər nikbinliyim artdı ki, yeni yaradılan Klub startap ekosistemə ciddi töhfələr verə biləcək.

Əlbəttə, burada biznes maraqlarından əlavə, həm sektorun həm də ölkənin inkişafını nəzərə almaq, risklərdən çəkinməmək, bir qədər əziyyətə qatlaşmaq və daha çox çalışmaq lazım gəlir.

Ümid edirəm RİNN və İnnovasiya və Rəqəmsal İnkişaf Agentliyi də Kluba dəstəyi əsirgəməyəcək.

Yeri gəlmişkən, nazir artıq dövlət və özəl tərəfdaşlıq çərçivəsində, 10 milyon büdcəsi olan Vençur Fondun ən yaxın zamanda yaradılacağı ilə bağlı açıqlama da verdi.

Ekosistemin inkişafını ləngidən bəzi məqamlara münasibət bildirərkən yaxın zamanlarda bu istiqamətdə konkret addımlar atılacağını bildirdi.

Düşünürəm ki, bu addımlar da ekosistemə ciddi dəstək olacaq.

Müşahidələrimiz isə göstərir ki, sektorun inkişafı istiqamətində son zamanlar müəyyən addımlar atılsa da ləngimələr var.

Araşdırmalar göstərir ki, qonşu ölkələrdə və regionda innovativ ekosistemin və rəqəmsal mühitin inkişafına böyük yatırımlar edilir, xarici resursları cəlb etməyə çalışırlar.

Bu baxımdan, potensial imkanlarımızın daha yüksək olduğu bir şəraitdə uzun müddətli ləngimələrin müasir çağlrışlara adekvat olmadığı qənaətindəyəm.

Zənnimcə, ölkəmizdə ekosistemin inkişafı üçün münbit şəraitin yaradılması, qanunvericiliyin təkmilləşdirilməsi, regional və qlobal bazarlara çıxışın, universitetlərdə innovativ mühitin formalaşdırılması istiqamətində işlər canlandırılmalıdır.”