RƏQƏMSAL DÜNYA

Bakı, 2 iyun 2022 – Rəqəmsal İnkişaf və Nəqliyyat Nazirliyinin tabeliyində fəaliyyət göstərən Azərkosmos İspaniyanın aerokosmik, müdafiə və təhlükəsizlik sahələri üzrə fəaliyyət göstərən “GTD Ingenieria de Sistemas” şirkəti ilə Niyyət Protokolu imzalayıb

Xeberler.az bildirir ki, bu sənəd kosmik sahə üzrə qarşılıqlı fayda gətirəcək layihələrdə əməkdaşlığın təməlini qoyur.

Niyyət Protokoluna əsasən Azərkosmos “GTD Ingenieria de Sistemas” şirkəti ilə birgə ölkədə kosmik sahə üzrə analitika və həllər, peyk sistemlərinin inkişafı, təhsil proqramları çərçivəsində bilik və təcrübə mübadiləsi imkanları yaradacaq.

Sənəddə Azərbaycanda kosmik sahə ilə bağlı tədqiqat və inkişaf fəaliyyətlərinin dəstəklənməsi, həmçinin peyk sistemlərinin mühəndis həllərinə dair texnologiya transferinin təmin olunması məsələləri əksini tapıb.

İkitərəfli razılaşmada hazırda kosmik sahənin prioritet istiqamətlərindən biri olan Yer səthinin məsafədən müşahidəsi və geoməkan məlumatlarının idarə olunması sahəsində ən müasir informasiya texnologiyalarının tətbiqinin böyük əhəmiyyət kəsb etdiyi də vurğulanıb.

Qeyd edək ki, “GTD Ingenieria de Sistemas” 30 ildən çox fəaliyyət göstərən yüksək texnologiya şirkətidir. Şirkət kosmos, aerokosmik və enerji sənayesində, o cümlədən elm və tədqiqat əsaslı layihələrdə, infrastruktur layihələrində mühəndis və texniki həllərin təmin olunması üzrə ixtisaslaşıb.

Azərkosmos haqqında

Azərbaycan Respublikasının Kosmik Agentliyi – Azərkosmos Azərbaycanda innovativ kosmik ekosistemin inkişafının aparıcı qüvvəsidir. Cənubi Qafqazda ilk və yeganə peyk operatoru olan Azərkosmos 2010-cu ildə fəaliyyətə başlayıb. Hazırda iki telekommunikasiya peyki (Azerspace-1 və Azerspace-2) və bir Yer səthinin məsafədən müşahidəsi peyki (Azersky) vasitəsilə dünya üzrə tərəfdaşlarımıza yüksək keyfiyyətli peyk xidmətləri təqdim edirik. Peyklərimiz üzərindən geniş çeşiddə xidmətlər və həllər təqdim etməklə yanaşı, Azərbaycanda kosmik sənayenin inkişafının dəstəklənməsi və səmərəli həllərin yaradılması məqsədilə Azərkosmosun nəzdində fəaliyyət göstərən Tədqiqat və İnkişaf Mərkəzində müxtəlif layihələr həyata keçirilir. Bundan əlavə, beynəlxalq kosmik layihələr çərçivəsində xarici dövlətlərin kosmik agentlikləri ilə kosmosdan dinc məqsədlərlə istifadə üzrə qarşılıqlı əməkdaşlıq əlaqələri qururuq. Ölkəmizdə kosmik sahənin inkişafına töhfə verəcək innovativ ideyaların və startapların aşkar olunması və inkişaf etdirilməsi məqsədilə ölkənin startap ekosisteminə dəstəyin verilməsi də fəaliyyətimizin prioritet istiqamətlərindən biridir. Daha ətraflı məlumatı veb-saytımızdan ala bilərsiniz.