KOSMOS

Azərkosmos ASC Yer səthinin məsafədən müşahidəsi sahəsində böyük təcrübəsi olan Fransanın  Airbus Defence and Space şirkətinin əməkdaşları ilə  birgə “Azərbaycanda təbii sərvətlərin idarə edilməsində coğrafi məlumatların potensial töhfəsi” mövzusunda seminar keçirib.

Xeberler.az bildirir ki, Azersky peykinin təbii sərvətlərin idarə edilməsində tətbiqi barədə aidiyyəti benefisiarların maarifləndirilməsi məqsədilə keçirilən seminarda Ekologiya və Təbii Sərvətlər Nazirliyi, Fövqəladə Hallar Nazirliyi, Nəqliyyat Nazirliyi,  Müdafiə Sənayesi Nazirliyi, Energetika Nazirliyi, Elmin İnkişafı Fondu, AMAKA, Azərsu ASC, BMT-nin İnkişaf Proqramı, AMEA, Milli Aviasiya Akademiyası və ölkəmizdə fəaliyyət göstərən bir sıra beynəlxalq təşkilatların nümayəndələri iştirak edib.

Seminar çərçivəsində Azərkosmos və Airbus Defence and Space şirkətlərinin mütəxəssisləri tərəfindən Azersky, SPOT 6 və Pleiades peyklərinin texniki xüsusiyyətləri, peyk təsvirlərinin ətraf mühitin öyrənilməsində istifadəsi, geoməkan tədqiqatları, ətraf mühitlə bağlı fövqəladə hallar zamanı yaranan risklər, kəşfiyyat və hasilat xidmətləri haqqında ümumi məlumat, geoloji tədqiqatlar, neft sızıntıları və dağ-mədən sənayesində peyk təsvirlərindən istifadə mövzularında təqdimatlar keçirilib.

Əlavə olaraq, seminar iştirakçılarına 2015-ci ildə Azersky peykindən əldə olunmuş təsvirlərin tətbiq olunması ilə həyata keçirilən layihələr: 2015-ci ilin may-iyun aylarında Ermənistan silahlı qüvvələri tərəfindən işğal altında olan ərazilərdə törədilmiş yanğınların monitorinqi, Hirkan milli parkının kosmik monitorinqi, Hacıqabul gölünün akvatoriyasinin kosmik monitorinqi, dövlət sərhədlərinin monitorinqi və s. layihələr barədə məlumat verilib.

Bununla yanaşı, seminarda “Torpaq Sahələrinin İdentifikasiya Sistemi” (TSİS) layihəsi çərçivəsində peyk təsvirlərindən istifadə barədə də məlumat verilib. Ölkə başçısı cənab İlham Əliyevin verdiyi aidiyyəti tapşırıqlara müvafiq olaraq yaradılmış TSİS Azərbaycan e-Kənd təsərrüfatı sisteminin tərkib hissəsi olub, kənd təsərrüfatına birbaşa dövlət dəstəyinin idarə olunması və bu dəstəyə nəzarətin həyata keçirilməsi üçün əsas istinad sistemi hesab olunur.

Sistemin yaradılmasında 20 177 km² ərazinin peyk təsvirlərindən istifadə edilməsi qərara alınıb. Bu məqsədlə Azərkosmos ilə Azərbaycan Respublikasının Ekologiya və Təbii Sərvətlər Nazirliyi yanında Geodeziya və Kartoqrafiya üzrə Dövlət Agentliyinin Dövlət Aerogeodeziya Müəssisəsi arasında müqavilə imzalanıb və qeyd olunan ərazilərin peyk təsvirləri Azərkosmos tərəfindən təmin olunur.

Ötən il iyunun 30-da orbitə çıxarılmış və dekabrın 2-dən etibarən Azərkosmosa təhvil verilmiş Azersky peykinin 12 il müddətində fəaliyyət göstərəcəyi proqnozlaşdırılır.

Peykin müdafiə, təhlükəsizlik, fövqəladə hallar, təbii ehtiyatların tədqiqi, dənizçilik, ətraf mühitin mühafizəsi, şəhərsalma, xəritəçəkmə, kənd təsərrüfatı, turizm və s. kimi geniş tətbiq sahələri vardır. Bundan əlavə Azərkosmos Airbus Defence and Space şirkətinə məxsus, 0.5 m ayırdetməli Pleiades 1A və Pleiades 1B, TerraSAR-X və TanDEM-X peyklərinin Azərbaycanda rəsmi və yeganə satış təchizatçısıdır.

Xeberler.az