KOSMOS

Xəbər verdiyimiz kimi, hazırda  ikinci telekommunikasiya peykimiz, Azərspace-2-nin orbitə buraxılması istiqamətində işlər davam edir.

Xeberler.az Azerspace-2 istiqamətində görülən işlərlə maraqlanıb.
Azərkosmos ASC yeni peyklə bağlı  gələcək strategiyası, planları və hazırda gördüyü işlərlə bağlı Xeberler.az-ın suallarına münasibət bildirib:

-Növbəti telekommunikasiya peykinin və aşağı orbitli 2-ci peykin orbitə buraxılması istiqamətində hazırlıqlar nə yerdədir?

-Hazırda peyk operatoru olan Azərkosmos ASC-nin idarəçiliyində 2 peyk, ilk telekommunikasiya peyki Azerspace-1 və  aşağıorbitli  Azersky, Yer səthinin məsafədən müşahidə peyki fəaliyyət göstərir.
 2017-ci ildə Azərbaycana məxsus ikinci telekommunikasiya peykinin orbitə buraxılması üzərində işlər gedir. Yaxın gələcək üçün  2-ci aşağıorbitli peykin orbitə buraxılması isə nəzərdə tutulmayıb. 

-Azerspace2- ilə bağlı  hansı şirkətlərlə əməkdaşlıq edilir?

-İkinci telekommunikasiya peyki Azerspace-2-nin orbitə buraxılması istiqamətində nəzərdə tutulan tender davam edir. Açıq tender prosesi çərçivəsində təklif vermiş şirkətlər sırasına ABŞ-ın Orbital ATK və Space Systems Loral, Çinin China Great Wall Industry Corporation və Fransanın Airbus Defence and Space şirkətləri daxildir. Bu ilin III rübündə tender üzrə qalib şirkətin seçilməsi planlaşdırılır.

-Peykin buraxılması  nə vaxta nəzərdə tutulur?

-Azerspace-2 telekommunikasiya peykinin orbitə buraxılması 2017-ci ildə nəzərdə tutulub.  

-Aşağı orbitli əsas hansı məqsədlər üçün istifadə edilir, hansı xidmətləri təqdim edəcək?

-Qeyd edək ki, 2014-cü ilin dekabrında Azərkosmos və Fransanın Airbus Defence and Space şirkəti ilə imzalanmış müqaviləyə əsasən aşağıorbitli yüksək ayırdetməli (1.5 m ayırdetmə) Yer səthinin məsafədən müşahidə peyki Azersky artıq kommersiya yönümlü istifadədir. Azersky peykinin müdafiə, təhlükəsizlik, fövqəladə hallar, təbii ehtiyatların tədqiqi, dənizçilik, ətraf mühitin mühafizəsi, şəhərsalma, xəritəçəkmə, kənd təsərrüfatı, turizm və s. kimi geniş tətbiq sahələri var. Şirkətin strateji inkişaf planlarına gələcək illərdə çox yüksək ayırdetməli Yer səthinin məsafədən müşahidə peykini orbitə çıxarılmaqla Azersky peykinin təklif etdiyi xidmətlər spektrinin genişləndirilməsi daxildir.

-Bu Peykin hazırlanması üçün nə qədər vəsait nəzərdə tutulur?
Resursların icarəsindən ilk gəlir nə zaman və hansı həcmdə daxil olmağa başlayacaq?

-Azərkosmos ASC-nin verdiyi məlumata görə, Azerspace-2-nin orbitə buraxılması istiqamətində nəzərdə tutulan tender hələki davam edir. Resursların icarəsindən ilk gəlir nə zaman və hansı həcmdə daxil olmağa başlanılması haqqında məlumat tender prosesi bitdikdən sonra dəqiq məlum olacaq.

-Peykin istismarı nəticəsində Azərbaycan telekommikasiya sahəsində hansı müsbət nəticələr əldə edəcək?

-2017-ci ildə orbitə buraxılması nəzərdə tutulan Azerspace-2 sürətlə inkişaf edən Mərkəzi Avropa, Şərqi Avropa, Asiya və Sakit Okean regionlarında olan aparıcı DTH platformaları da daxil olmaqla bizim bu orbital mövqedə olan potensial  müştərilərimizin böyümək hədəflərini dəstəkləyəcək, Afrikada olan korporativ şəbəkələr üçün peyk əsaslı rabitə təmin edəcək. Bununla yanaşı, birinci telekommunikasiya peyki olan Azerspace-1-in orbitdəki ehtiyatı olacaq və Azərkosmosa müştərilərə daha etibarlı xidmət göstərmək imkanı verəcək.

-Yeni peyklərin xidmətlərinin təqdim ediləcəyi  dövlətlər, şirkətlərlə indidən işlər aparılırmı ?

-Azərbaycana məxsus ikinci telekommunikasiya peykinin  45° şərq uzunluğu orbital mövqeyinə qaldırılması üçün dünyanın peyk xidmətləri üzrə aparıcı şirkəti olan İntelsat S.A. (NYSE: I) ilə strateji razılaşma imzalanıb. Razılaşmaya əsasən,  Azərkosmos Avropa, Mərkəzi və Cənub-Qərbi Asiya, Yaxın Şərq və Sahara səhrasında cənubda yerləşən Afrika ölkələrində artan tələbi qarşılayacaq ikinci telekommunikasiya peyki üçün müəyyən olunmuş orbital mövqe əldə edib. İki şirkət növbəti iki il ərzində Azerspace-2 peykinin dizaynı üçün yaxından əməkdaşlıq edəcək və peykin istehsalı və idarə olunması mərhələlərində bir-birlərinin imkan və təcrübələrindən bəhrələnəcəklər.  Qeyd edək ki, Azerspace-2 regionda DTH, hökumət təşkilatları və şəbəkə xidmətləri sahəsində artmaqda olan tələbləri qarşılamaq üçün yüksək texniki imkanlar, əlverişli əhatə zonası və keyfiyyətli xidmət təklif edəcək. 

Sevinc Çəltikova