TƏDBİRLƏR

Azərbaycan prezidenti İlham Əliyev bu gün milli mətbuatın yaradılmasının 140 illiyi münasibətilə Mətbuat Şurasının üzvləri ilə görüşüb.

Xeberler.az Prezidentin rəsmi saytına istinadən məlumat verir ki, görüşdə İlham Əliyev ölkədə mətbuatın inkişafı ilə əlaqədar islahatların uğurla aparıldığını bildirib. Azərbaycanda medianın inkşafından danışan dövlət başçısı xüsusi olaraq internet medianın fəaliyyətinə toxunub.

İlham Əliyev Azərbaycanda internetin azad olduğunu deyib. Dövlət başçısı internet medianın daha çox dildə fəaliyyət göstərməsi, daha çox ölkədə müxbir məntəqələrinin olmasını təqdirəlayiq hal sayıb. Prezident bildirib ki, medianın beynəlxalq əlaqələrinin gücləndirilməsi, digər ölkələrin media orqanları ilə əlaqələrinin qurulması, həmçinin erməni diasporunun Azərbaycana qarşı apardığı mübarizənin qarşısının alınması üçün Azərbaycan mediası öz fəaliyyətini daha da gücləndirməlidir.

İlham Əliyev xəbərləri internet üzərindən bilavasitə özünün oxuduğunu deyib. Bu barədə jurmalistlərə açıqlamasında görüşdə iştirak dən “Yeni Müsavat” qəzetinin baş redaktoru Rauf Arifoğlu bildirib. Onun sözlərinə görə, görüşdə İlham Əliyev qeyd edib  ki, bəzi məlumatları ondan gizlətməyə çalışırlar:

"Amma mənim bütün məlumatlardan xəbərim var. Çünki mən media və saytlar vasitəsilə o məlumatları izləyirəm, oxuyuram. Bu baxımdan əməkdaşlığımızın davam etməsində maraqlıyam”. Bundan başqa, prezident idarəetmədə islahatlara ehtiyac olduğunu vurğulayıb. İlham Əliyev bu məsələdə medianın dəstəyinə və köməyinə ehtiyac olduğunu bildirib. Qeyd edib ki, Azərbaycan dövləti internet resurslarının güclənməsinə və ən tirajlı media internet resurlarının xarici dillərdə versiyalarının yaradılmasına çalışacaq və bu işdə media vasitələrinə hər cür dəstək verəcək.

Xeberler.az