AZNET

“Pezidentin  tapşırığına uyğun olaraq, İnternet medianın inkişafı üçün təkliflərlə çıxış edəcəyik”.

Xeberler.az Hafta.az-a istinadən məlumat verir ki, bunu Mətbuat Şurasının sədri Əflatun Amaşov deyib. O bildirib ki, danılmaz faktdır ki, ölkədə internet media xüsusi rola malikdir:
“Birinci Avropa Oyunları zamanı da Azərbaycanın beynəlxalq imicinin formalaşmasında, ölkəmizə qarşı olan qüvvələrlə informasiya savaşında internet mediası böyük işlər gördü. Cənab prezident də öz çıxışında bunu xüsusi vurğuladı. Ölkə əhalisinin 75 faizdən çoxu İnternetdən istifadə edir. Cənab prezident İlham Əliyevlə görüşümüz zamanı internet mediası ilə bağlı da müzakirələr oldu. Təklif etdim ki, yazılı mətbuatda olduğu kimi İnternet üzərindən yayımlanan media vasitələrinə də yardım olunsun. Bu təklifim cənab prezident tərəfindən yüksək qiymətləndirildi. Yəqin ki, yaxın zamanlarda bununla bağlı müsbət addımlar atılacaq”.

Əflatun Amaşov İnternet medianın çatışmayan cəhədləri barəsində də danışıb:

“Çatışmayan cəhətlər müxtəlif zamanlarda olub. Məsələn, ötən il yayda ordu ilə bağlı baş verən olayları göstərmək olar. Hazırda elə bil zamandır ki, dünyanın hər yerində olduğu kimi Azərbaycanda da bu sahə ənənəvi media ilə müqayisədə daha çox inkişaf edir. Eyni zamanda yazılı mətbuatın funksiyalarının xeyli hissəsini öz üzərinə götürə bilib. Bu bir həqiqətdir. Yəqin ki, zaman keçdikcə İnternet media da püxtələşəcək. Bu sahədən şəxsi mənafeləri üçün istifadə edənlər sıradan çıxacaq. Bir müddət sonra sahənin tam sahibləri fəaliyyətdə qalacaqlar. Bu baxımdan qüsurları göstərməklə yanaşı, İnternet mediasının inkişafı üçün əməli addımlar atmağın vaxtı çatıb”.

Xeberler.az