TƏHLÜKƏSİZLİK

Azərbaycan Kibertəhlükəsizlik Mərkəzinin (AKM) təşəbbüsü və Elektron Təhlükəsizlik Xidmətinin tərəfdaşlığı ilə “Rəhbərlər üçün kibertəhlükəsizlik seminarı” silsiləsindən növbəti sessiya baş tutub.

Xeberler.az məlumat verir ki, seminarda 20-yə yaxın dövlət qurumunun kibertəhlükəsizlik və informasiya təhlükəsizliyindən məsul olan rəhbər şəxslər iştirak ediblər.

Seminarda Elektron Təhlükəsizlik Xidmətinin rəisi Samir Rəsulov rəqəmsallaşmanın fonunda artan kibertəhdidlərə qarşı önləyici tədbirlərin və informasiya təhlükəsizliyinin hərtərəfli təminatının dövlətimiz üçün kritik önəm kəsb etdiyini vurğulayıb.

İnnovasiya və Rəqəmsal İnkişaf Agentliyinin İnformasiya təhlükəsizliyi departamentinin müdiri Şahmar Hacıyəhyayev çıxışı zamanı təcrübə mübadiləsi üçün şərait yaradan bu seminarın “Azərbaycan Respublikasının informasiya təhlükəsizliyi və kibertəhlükəsizliyə dair 2023-2027-ci illər üçün Strategiyası”nda müəyyən edilmiş tədbirlərin reallaşdırılması istiqamətində vacib addım olduğunu diqqətə çatdırıb.

İki gün davam edən seminarda “Technion” Texnologiya İnstitutundan aparıcı ekspertlər kibertəhlükəsizliyin gündəmdə olan çağırışları və qabaqcıl təcrübələrini əhatə edən təqdimatlarla çıxış ediblər. Ekspertlər milli kibermüdafiə sistemləri, ən geniş yayılmış zərərverici proqramlara və haker hücumlarına qarşı qabaqlayıcı strategiyalar və digər kritik mövzular haqqında təcrübələrini bölüşüblər, eləcə də dövlət qurumlarının rəhbər nümayəndələri ilə fikir mübadiləsi aparıblar.

İnteraktiv formatda keçən təqdimatların sonunda iştirakçıların sualları cavablandırılıb. Bundan əlavə, kibertəhdidlərin növünün təyin edilməsini özündə ehtiva edən simulyasiya keçirilib.