Xəbərlər.az

Dövlət saytlarının fəaliyyəti dayandırılacaq

30-06-2010 / 12:41

Böyük Britaniya hakimiyyəti yaxın zamanda ölkənin müxtəlif dövlət strukturlarının bütün 820 saytını nəzərdən keçirəcək və vətəndaşlara daha az fayda gətirən resursların fəaliyyətini dayandıracaq. Bu barədə Böyük Britaniya Nazirlər Kabinetinin Katibliyinin rəhbəri Frensis Mod bəyan edib.

Britaniya Mərkəzi İnformasiya İdarəsinin hesabatına əsasən, ölkə hökuməti tərəfindən 2009 – 2010-cu illər ərzində dövlət saytlarının işlənib hazırlanmasına və dəstəklənməsinə 94 milyon funt sterlinq ($141 млн) məbləğində vəsait xərclənib. Bundan əlavə daha 32 milyon funt sterlinq ($48 млн) sözügedən resurslarda çalışan əməkdaşların məvaciblərinin ödənilməsinə yönəldilib, Cnews yazır.

Statistikaya əsasən Britaniyada dövlət resursunun hər bir ziyarətçisi hökumət üçün 11,78 funt sterlinqə (təqribən $17) başa gəlir. Dövlət idarələrinin 16 faizi öz veb-resurslarının nə cür istifadə olunduğu barədə məlumatlı deyillər, onların təxminən dörddə birinin isə portalların dəstəklənməsinə xərclənən məbləğ barədə məlumatları olmur.

“Bir çox lazımsız saytların fəaliyyətinə daha ehtiyac yoxdur. Vətəndaşlara yüksək səviyyəli xidmət göstərməyən saytların saxlanılması düzgün deyil”, - F. Mod qeyd edib. Onun sözlərinə görə, dövlət saytlarının təxminən üç dörddə bir hissəsinin fəaliyyəti dayandırılacaq.

ŞƏRHLƏR