Multimedia Mərkəzinin həyata keçirdiyi dövlət qurumlarının rəsmi internet resurslarının İnformasiya açıqlığı üzrə monitorinqi davam edir.
Qeyd edək ki, Mərkəz 2006-cı ildən başlayaraq hər il sistemli və ardıcıl şəkildə dövlət qurumlarının informasiya açıqlığı vəziyyətini araşdırır, Onlayn şəffaflıq üzrə müvafiq Hesabatlar və Reytinq Cədvəlini tərtib edir.
Bu il həyata keçirilən Monitorinq prosesində yerli icra hakimiyyəti orqanlarının da rəsmi resurslarının informasiya açıqlığı və şəffaflıq vəziyyəti araşdırılır.
Monitorinq prosesi yerli qanunvericiliyə və beynəlxalq normalara əsaslanaraq Mərkəz tərəfindən hazırlanan Metodika əsasında həyata keçirilir.
Metodikada dövlət qurumlarının rəsmi İnternet resurslarında yerləşdirilən məlumatların, xidmətlərin kəmiyyət və keyfiyyət cəhətdən analiz edilməsi və qiymətləndirilməsi nəzərdə tutulub.
Bu il həyata keçiləcək Monitorinq prosesində 75 Mərkəzi icra orqanının ( Nazirliklər, Dövlət komitələri və s ) və 67 Yerli icra orqanının (Rayon və şəhər icra hakimiyyətləri) rəsmi saytlarının informasiya açıqlığı vəziyyəti araşdırılacaq.
Monitorinq başlayandan indiyədək 25 Mərkəzi icra orqanı və 16 yerli icra hakimiyyəti orqanının İnternet resursu monitorinq olunub. Araşdırmaların nəticələri www.informasiya.org saytında yerləşdirilib.
Cari ilin sonunadək davam edəcək Monitorinq əsasında konkret hər bir dövlət qurumunun rəsmi saytı üzrə icmal və tövsiyyələrin hazırlanması, dövlət qurumlarının vətəndaş cəmiyyətinə informasiya açıqlığı üzrə Reytinq Cədvəlinin və Yekun Hesabatın hazırlanması nəzərdə tutulub.
Monitorinq prosesi Vətəndaşlara Xidmət və Sosial İnnovasiyalar üzrə Dövlət Agentliyi yanında Elektron xidmətlərin təşviqi üzrə İctimai Şura ilə əməkdaşlıq şəraitində keçirilir. (www.informasiya.org )
