"Bu gün saat 10-da adi ipoteka kreditləri üzrə müraciətlərin qəbuluna start verilməliydi. Yəni İpoteka və Kredit Zəmanət Fondu məhz bu saatda ipoteka kreditləşməsi məqsədilə müvəkkil banklara ipoteka kreditlərinin verilməsi üçün limitlərə müraciətləri qəbul etməliydi.
"Verilməliydi", "etməliydi" sözünü ona görə qeyd edirəm ki, iştirakçıların xeyli hissəsi prosesin baş tutmadığını bildirirlər. Müzakirələr, şikayətlər hələ də davam edir".
Xeberler.az bildirir ki, bununla bağlı Azərbaycan İnternet Formunun Prezidenti, ekspert Osman Gündüz sosial media hesabında paylaşım edib.
Ekspertin sözlərinə görə, rəsmi resursun saat 10-da edilən müraciətlərə cavab vermədiyi, seçimin mümkün olmadığı, ümumiyyətlə müraciətin mümkün olmadığı və sistemin çökdüyü bildirilir. Sonradan daxil olduqda isə limitlərin bitdiyi qeyd edilib:
"Müraciətlər "Elektron ipoteka və kredit zəmanət “sistemi üzərindən SİMA Token və ya Asan İmza vasitəsilə həyata keçirilir.
İstifadəçilər İpoteka və Kredit Zəmanət Fondunun sosial hesablarında bununla bağlı müzakirələrdəki rəylərinin silinməsindən də şikayətlənirlər. Baş verənlər, əlbəttə təəssüf doğurur".
Osman Gündüz bildirib ki, Dövlət xidmətlərinin reallaşmasında texnologiyaların tətbiqi insan amilinin minimuma endirilməsi, şəffaflıq baxımından effektiv olsa da, bütün bunlar sonda vətəndaş məmnunluğuna gətirib çıxarmalıdır. Əgər bu baş vermirsə onda demək hardasa səhvlərə qüsurlara yol verilib:
"Düşünürəm ki, Fond baş verənlərlə bağlı ağlabatan açıqlama verməlidir. Problemin haradan qaynaqlandığına (sistemin özü ilə bağlı, daxil olmaqla bağlı, bankların seçimi ilə bağlı və s), insan amili ilə bağlı sui-istifadə risklərinə, kiber hücumla bağlı məsələlərə aydınlıq gətirməlidir.
Şəffaflıq, ictimai nəzarət üçün imkanlar yaradılmalıdır.
Aidiyyatı dövlət qurumları və müstəqil ekspertlərinin prosesin gedişində iştirakı təmin edilməlidir.
Daxil olan müraciətlərin emal olunması ilə bağlı statistikanı açıqlamaq faydalı olardı.
Uğurlu olan ilk və son müraciətlərlə bağlı məlumatlar ağlabatan formada açıqlanmalıdır".
Ekspert qeyd edib ki, sabah saat 20-da güzəştli ipoteka kreditləri üzrə müraciətlərin qəbuluna start veriləcək:
"Ümid edirəm Fond prosesin gedişinə şəffaf nəzarət imkanlarını gücləndirəcək və müraciətlərin problemsiz qəbulunu reallaşdıra biləcək".
