Azərbaycan Respublikasının İpoteka və Kredit Zəmanət Fondu tərəfindən 2026-cı il ərzində ipoteka kreditləşməsinin davam etdirilməsi məqsədilə müvəkkil banklara müvafiq limitlər ayrılıb.
Xeberler.az bildirir ki, bu barədə Azərbaycan Respublikasının İpoteka və Kredit Zəmanət Fondu və İnformasiya Təhlükəsizliyi Dövlət Xidməti birgə məlumat yayıb.
Məlumata görə, adi ipoteka kreditləri üzrə müraciətlərin qəbulu 5 mart 2026-cı il saat 11:00-dan, güzəştli ipoteka kreditləri üzrə müraciətlərin qəbulu isə 6 mart 2026-cı il saat 11:00-dan başlayıb.
Vətəndaş müraciətlərinin Elektron İpoteka və Kredit Zəmanət sistemi üzərindən şəffaf və real vaxt rejimində qəbulunun təmin edilməsi məqsədilə Xüsusi Rabitə və İnformasiya Təhlükəsizliyi Dövlət Xidməti ilə əməkdaşlıq çərçivəsində sistemdə dayanıqlılıq və təhlükəsizlik testləri aparılıb. Tətbiq olunan informasiya təhlükəsizliyi mexanizmləri vasitəsilə sistemin fasiləsiz və təhlükəsiz fəaliyyəti təmin olunaraq daimi nəzarətdə saxlanılıb.
Qeyd olunub ki, adi və güzəştli ipoteka kreditlərinin əlverişli şərtlərlə və aşağı faiz dərəcələri ilə təqdim olunması əhali arasında bu kreditlərə yüksək tələbat yaradıb. Ayrılmış limitlər çərçivəsində adi ipoteka krediti əldə etmək üçün 1522 nəfərin (ümumi müraciət sayı 9019), güzəştli ipoteka krediti üçün isə 643 nəfərin (ümumi müraciət sayı 4369) müraciəti qeydə alınıb.
Bildirilib ki, əvvəlki illərdə olduğu kimi, ipoteka kreditləri üzrə müraciətlərin qəbulu və sonrakı proseslər mövcud qanunvericiliyə və Fondun daxili qaydalarına uyğun şəkildə davam etdirilir. Sistemin təhlükəsiz fəaliyyəti isə tətbiq edilən informasiya təhlükəsizliyi mexanizmləri vasitəsilə daim nəzarətdə saxlanılır.
