Intel Infineon şirkətinin simsiz biznesini əldə edir
Dünyanın ən iri yarımkeçirici istehsalçısı Intel korporasiyası Almaniyanın Infineon şirkətinin tərkibində smartfonlar üçün çip istehsalı ilə məşğul olan Wireless Solutions Business (WLS) şirkətini əldə edir. Sazişin məbləği 1,4 milyard ABŞ dollarına dəyərləndirilir.
Sazişin 2011-ci ilin birinci rübünə planlaşdırılan tam imzalandığından sonra WLS fəaliyyətini ayrıca şirkət kimi davam etdirəcək. WLS-in alınması Intel-ə Wi-Fi və 4G WiMAX texnologiyalarına Infineon şirkətinin 3G imkanlarını əlavə etməklə simsiz rabitə sahəsində xidmət çeşidlərini genişləndirmək imkanı verəcək.
Xatırladaq ki, Wireless Solutions Business-in alınması avqust ayında Intel tərəfindən imzalanan ikinci bu cür iri sazişdir. Belə ki, bundan əvvəl Intel məlumatların qorunması üçün proqram təminatı istehsalçısı olan McAfee şirkəti ilə müvafiq sazişin bağlandığını bildirmişdir. Həmin saziş isə 7,68 milyard ABŞ dollarına dəyərləndirilib.
