TƏDBİRLƏR

İnnovasiya və Rəqəmsal İnkişaf Agentliyi (İRİA) Almaniyanın özəl universiteti - “Constructor University Bremen” ilə birgə əməkdaşlıq çərçivəsində rəqəmsal bacarıqların inkişafına yönəlmiş “Rəqəmsal bacarıqların proqnozlaşdırılması” tədqiqat layihəsini həyata keçirib.

Xeberler.az məlumat verir ki, layihə çərçivəsində oktyabr-noyabr aylarını əhatə edən strateji proqnozlaşdırma sessiyaları təşkil olunub. Dövlət qurumları və agentlikləri, aparıcı universitetlər, peşə təhsil müəssisələrindən olan ekspert qrupu rəqəmsal bacarıqların inkişafı üçün problemləri araşdıraraq mövcud imkan və trendləri birgə müəyyən ediblər. Sessiyalarda, həmçinin Beynəlxalq Əmək Təşkilatı tərəfindən hazırlanmış “Skills Foresight” metodologiyasından istifadə edilib. Bu yanaşma maraqlı tərəflərə tendensiyaları cəld təhlil etməyə, bacarıqlardakı boşluqları dəqiqləşdirməyə və uzunmüddətli strategiyalar təklif etməyə imkan verir.

Sessiyalarda təklif olunan tövsiyələrdən biri də İT ilə əlaqəli təhsil proqramlarının paylanmış sisteminin (“şəbəkə universiteti”) yaradılması olub. Belə bir sistem vasitəsilə mövcud yerli universitetlərlə telekommunikasiya və bank sektorunun böyük şirkətləri arasında tərəfdaşlıq yaradılması üçün istifadə oluna bilər. Təklif edilən bu model rəqəmsal məhsuların inkişafı, kibertəhlükəsizlik və məlumat analitikası da daxil olmaqla ən çox tələb edilən bacarıqlara yönələcək.

Sessiyaların nəticələri qlobal tendensiyaların və Azərbaycan əmək bazarının kəmiyyət analitikası ilə birləşdirilərək milli səviyyədə rəqəmsal bacarıqların keyfiyyətinin yüksəldilməsi üçün siyasət tövsiyələrinin əsasını təşkil edəcək.

Qeyd edək ki, layihənin məqsədi rəqəmsal bacarıqlardakı boşluqları aradan qaldırmaq və işçi qüvvəsini sürətlə rəqəmsallaşan iqtisadiyyatın tələbləri ilə uyğunlaşdırmaqdır.