İNNOVASİYA VƏ STARTAP

İqtisadiyyat Nazirliyinin tabeliyindəki Kiçik və Orta Biznesin İnkişafı Agentliyi (KOBİA) təhsil, elm, tədqiqat və dəstək sahələri üzrə layihələrin maliyyələşdirilməsi məqsədilə 4-cü qrant müsabiqəsi elan edib.

Bu barədə Xeberler.az-a KOBİA-dan məlumat verilib.

Müsabiqənin şətlərinə əsasən, müsabiqədə mikro, kiçik və orta sahibkarlıq subyektinə aid olan hüquqi və ya fiziki şəxslər iştirak edə bilərlər. Layihələr təhsil, elm, tədqiqat və dəstək sahələrindən birinə aid olmalıdır. Hər bir şəxs müsabiqə çərçivəsində yalnız 1 layihə təqdim etmək hüququna malikdir.

Həmçinin bildirlir ki, layihələrin icra müddəti 3 aydan az, 12 aydan çox olmamalıdır. Digər qurumlar tərəfindən tam maliyyələşdirilmiş, icrası davam edən və ya başa çatmış layihələr Agentlik tərəfindən əlavə olaraq və ya təkrar maliyyələşdirilə bilməz.

Müsabiqədə iştirak üçün tələb olunan sənədlər tam şəkildə təqdim olunmalıdır. Layihə çərçivəsində müəyyən edilmiş işlərin icrasına dekabrın 1-dən başlanılması nəzərə alınmalıdır. Həmçinin, müsabiqəyə təqdim edilən layihələr Azərbaycan dilində tərtib edilməlidir.

Ayrılan maliyyə vəsaitinin həcmi hər bir layihə üzrə maliyyələşdirilmə məbləğinin dəyəri maksimum 20 000 manat həcmində nəzərdə tutulur.

Layihə sənədlərinin qəbulu 14 avqust 2023-cü il, saat 09:00-dan – 13 sentyabr 2023-cü il saat 18:00-dək həyata keçiriləcək. Qeyd edək ki, müəyyən edilmiş vaxtdan əvvəl və ya sonra təqdim olunan layihə sənədləri qəbul olunmayacaq.

Müsabiqənin keçirilmə vaxtı sentyabrın 15-dən noyabrın 14-dəkdir. Müsabiqədə iştirak etmək istəyən KOB subyektləri ərizə forması, müsabiqəyə təqdim olunan layihə, layihənin büdcəsinin maliyyə əsaslandırılması, KOB subyekti olan fiziki şəxsin, yaxud hüquqi şəxsin nümayəndəsinin şəxsiyyətini və səlahiyyətlərini təsdiq edən sənədlərin surətləri, müraciət edən hüquqi şəxs olduqda hüquqi şəxslərin dövlət reyestrindən çıxarışının və nizamnaməsinin surətləri sənədləri ilə 14 avqust 2023-cü il saat 09:00-dan – 13 sentyabr 2022-ci il saat 18:00-dək elektron formada ([email protected]) və ya kağız daşıyıcılarda birbaşa Agentliyə (Bakı şəhəri, Ziya Bünyadov 38C, 1969-cu məhəllə, “Bakı KOB evi”) müraciət edə bilərlər.

Müvafiq sənədləri aşağıdakı linkdən yükləyə bilərsiniz: https://smb.gov.az/az/nav/qrant

Müsabiqənin nəticələri barədə məlumat 15 noyabr 2023-cü il tarixindən sonra KOBİA-nın www.smb.gov.az rəsmi internet səhifəsində yerləşdiriləcək.