RƏQƏMSAL DÜNYA

May ayında Milli Ödənişlər Sistemində Ani Ödənişlər Sisteminin payı 54 faizə çatıb. Qarşıdakı dövrdə bu göstəricinin daha da artırılması planlaşdırılır.

Xeberler.az məlumat verir ki, bu barədə Azərbaycan Mərkəzi Bankının sədr müavini Vüsal Xəlilov “Beynəlxalq Maliyyə və Bankçılıq Sammiti 2026: Türk Dövlətlərinin Qlobal Maliyyə İnteqrasiyası” mövzusunda keçirilən beynəlxalq tədbirdə çıxışı zamanı məlumat verib.

Onun sözlərinə görə, Ani Ödənişlər Sisteminin inkişafı istiqamətində mühüm işlər görülür və sistemin əhatə dairəsi davamlı olaraq genişləndirilir.

V.Xəlilov qeyd edib ki, sammitlərin regional xarakter daşıması maliyyə sektorunda əməkdaşlığın güclənməsi baxımından əhəmiyyətlidir. O vurğulayıb ki, maliyyə sektorunun inkişafında Mərkəzi Bankın rolu böyükdür və qurumun fəaliyyətində əsas prioritetlər şəffaflıq və effektiv kommunikasiyadır.

Sədr müavini bildirib ki, maliyyə sektorunun üzləşdiyi əsas çağırışlardan biri xərclərlə bağlıdır. Bu xərclərə həm rəqəmsallaşma prosesləri, həm də nağdsız ödənişlərin inkişafı ilə əlaqədar yaranan məsrəflər daxildir.

“Az-QR ödənişləri hazırda bazarda ən aşağı xərcli ödəniş vasitələrindən biridir. Bu isə təsərrüfat subyektlərinin əməliyyat xərclərinin azalmasına imkan yaradır. Həyata keçirilən bütün tədbirlər məhz xərc çağırışlarının aradan qaldırılmasına xidmət edir. Dünyada rəqəmsallaşma səviyyəsi artdıqca bu istiqamətdə təşəbbüslərin sayı da çoxalır. Mərkəzi Bank tərəfindən bununla bağlı kompleks tədbirlər həyata keçirilir”, – deyə V.Xəlilov vurğulayıb.