SOSİAL MEDIA

Yeni qanun qadağadan daha çox uşaqlar üçün yeni imkanlar yaradan bir sənəd kimi cəmiyyətə kommunikasiya edilməlidir.

Xeberler.az məlumat verir ki, bunu İnsan hüquqları, Ailə qadın və uşaq məsələləri və Hüquq siyasəti və dövlət quruculuğu komitələrinin birgə iclasında İnzibati Xətalar Məcəlləsində, “İnformasiya, informasiyalaşdırma və informasiyanın mühafizəsi haqqında” və “Uşaqların zərərli informasiyadan qorunması haqqında” qanunlarda dəyişiklik edilməsi barədə qanun layihəsinin müzakirəsində Medianın İnkişafı Agentliyinin icraçı direktorunun müavini Natiq Məmmədli deyib.

O, həmçinin qeyd edib: “Ola bilsin, bizim övladlarımız internetdə kifayət qədər vaxt keçirdirlər. Aydın məsələdir, məktəblərimizdə verilən tapşırıqlar da elədir ki, onların həll edilməsi üçün uşaqlar internetdə olmalıdırlar və lazımlı resurslardan faydalanmalıdırlar. Biz rəqəmsal mühitdə maarifləndirici resurslarımızın sayını artırmalıyıq”.

Natiq Məmmədli bildirib ki, rəqəmsal reallıq heç də təhdidlərlə dolu deyil. Onun pozitiv tərəfləri kifayət qədər genişdir. Bizi sevindirən məqam odur ki, insanlar artıq informasiyanın yalnız passiv şəkildə istifadəçisi deyillər, onlar, eyni zamanda, informasiyanı istehsal edirlər. Bu, rəqəmsal və texnoloji bir inqilabi dəyişiklikdir. Bu, insanlar üçün çox yaxşı fürsətlər verir.