TƏHLÜKƏSİZLİK

İyunun 4-də Ailə, Qadın və Uşaq Problemləri üzrə Dövlət Komitəsinin təşkilatçılığı ilə insan alveri ilə mübarizə sahəsində “Uşaqların kibermühitdə müdafiəsi və rəqəmsal təhlükələrə qarşı birgə fəaliyyət” mövzusunda dəyirmi masa keçirilib.

Xeberler.az məlumat verir ki, tədbirin əsas məqsədi uşaqların kibertəhlükəsizliyinin təmin olunması, zərərli informasiya resurslarından müdafiəsi, sosial media və süni intellekt texnologiyalarının yaratdığı risklərin təhlili, eləcə də insan alveri və məcburi əməyə qarşı mübarizədə dövlət qurumlarının əlaqələndirilmiş fəaliyyəti müzakirə olunub.

Ailə, Qadın və Uşaq Problemləri üzrə Dövlət Komitəsinin sədr müavini Aynur Sofiyeva uşaqların rəqəmsal mühitdə qarşılaşdığı təhlükələrə qarşı ardıcıl və kompleks dövlət strategiyasının həyata keçirildiyini diqqətə çatdırıb. O qeyd edib ki, informasiya texnologiyalarının sürətli inkişafı şəraitində kiberməkanda uşaqların müdafiəsi prioritet istiqamətlərdən biridir.

A.Sofiyeva əlavə edib ki, bu sahədə qəbul olunan normativ-hüquqi sənədlər, milli fəaliyyət planları və dövlət proqramları uşaqların rəqəmsal risklərdən qorunmasını təmin etməklə yanaşı, insan alveri və məcburi əmək cinayətlərinin qarşısının alınmasına yönəlib. O, “Uşaqların hüquqlarının müdafiəsi haqqında” və digər əlaqədar qanunvericilik aktlarının icrasında koordinasiyalı əməkdaşlıq və ictimai nəzarətin vacibliyini xüsusi vurğulayıb.

Sonra kiberməkanda uşaqların qarşılaşa biləcəyi risklərə dair maarifləndirici sosial videoçarx nümayiş etdirilib.

Komitənin İnformasiya və analitik araşdırmalar şöbəsinin müdiri Elgün Səfərov bildirib ki, uşaqların rəqəmsal mühitdə qorunması yalnız texniki deyil, həm də psixoloji və mənəvi təhlükəsizliyi əhatə edən məsələdir. Onun sözlərinə görə, internet istifadə edən uşaqların 72 faizi rəqəmsal təhdidlərə məruz qalıb, lakin bu hadisələrin çoxu rəsmi qaydada qeydə alınmır. Azərbaycanda uşaqların 75 faizi hər gün internetdən istifadə edir, ancaq yalnız 8 faizi özünü tam təhlükəsiz hiss edir, valideynlərin isə 67 faizi uşaqlarının onlayn fəaliyyətini nəzarətdə saxlamır. Buna görə də onların müdafiəsi üçün kompleks və sistemli tədbirlərin həyata keçirilməsi zəruridir.

Daxili İşlər Nazirliyinin Baş İctimai Təhlükəsizlik İdarəsinin şöbə rəisinin müavini, polis mayoru İmran Əliyev çıxışında zərərli informasiyadan uşaqların qorunması üçün dövlət və qeyri-dövlət qurumlarının sıx əməkdaşlığının vacibliyini vurğulayıb. O, insan alveri və uşaqların müdafiəsi sahəsində Nazirliyin fəaliyyətinin davam etdiyini, məktəblərdə və təhsil müəssisələrində 2 mindən çox maarifləndirici tədbirin keçirildiyini diqqətə çatdırıb.

Elm və Təhsil Nazirliyi nəzdində Təhsil Sisteminin İnformasiyalaşdırılması İdarəsinin rəis müavini Ayaz Abuşov bildirib ki, internetdə Azərbaycan dilində keyfiyyətli məzmunun azlığı azyaşlıların əxlaqi və pedaqoji baxımdan uyğun olmayan digər dillərdəki resurslara üz tutmasına səbəb olur və bu istiqamətdə yerli kontentin artırılması vacibdir.

Audiovizual Şuranın Hüquq və beynəlxalq əməkdaşlıq şöbəsinin baş məsləhətçisi Ayxan Sadıqlı isə qeyd edib ki, rəqəmsal mühitdə uşaqların qorunması yalnız texnoloji vasitələrlə deyil, hüquqi və maarifləndirici tədbirlərlə də təmin olunmalıdır. O əlavə edib ki, yerli platformalarda uşaqlar üçün uyğun və inkişaf etdirici məzmunların təşviqi önəmli məsələlərdəndir və Şura beynəlxalq təcrübəyə uyğun hüquqi bazanın formalaşdırılması üçün monitorinqlər aparır.

Rəqəmsal İnkişaf və Nəqliyyat Nazirliyinin yanında Elektron Təhlükəsizlik Xidmətinin əməkdaşı Gülər Rzayeva uşaqların sosial şəbəkələrdə fərdi məlumatlarının qorunmasının əsas məsələ olduğunu qeyd edib, xidmətin bu istiqamətdə maarifləndirmə və monitorinq fəaliyyətlərini həyata keçirdiyini, rəqəmsal savadlılığın artırılması üçün tədbirlər gördüyünü vurğulayıb.

Dövlət Əmək Müfəttişliyi Xidməti Daxili nəzarət və normativ-hüquqi sənədlərlə iş şöbəsinin müdir müavini Günel Baxşıyeva isə qurumun normativ-hüquqi sənədlərin təkmilləşdirilməsi və uşaqların hüquqlarının qorunması üçün daxili nəzarətin gücləndirilməsi istiqamətində iş apardığını bildirib.

Sonda iştirakçılar arasında açıq müzakirələr keçirilib, fikir mübadiləsi aparılıb və müvafiq tövsiyələr səsləndirilib.