SOSİAL MEDIA

Meta 8 apreldən etibarən ABŞ-də fakt yoxlama xidmətini dayandıracaq.

Xeberler.az bildirir ki, şirkətin beynəlxalq əlaqələr üzrə rəhbəri Coel Kaplanın verdiyi məlumata görə, bu qərar artıq yanvar ayında elan olunmuşdu, lakin tətbiqi tarixinin 8 aprel olması daha geniş diqqət çəkib. 

Meta sosial platformalarındakı məzmun moderasiyasını yüngülləşdirərək, fakt yoxlama xidmətini ləğv etməyə qərar verib. Bu, o deməkdir ki, bundan sonra Meta istifadəçilərinin yaydığı məlumatları müstəqil ekspertlər yoxlamayacaq. Əvəzində şirkət, istifadəçilərə yazılar üzərində qeydlər etməyə imkan verən yeni bir sistem tətbiq edəcək – bu sistem "Community Notes" (İctimai Qeydlər) adlanır. Facebook, Instagram və Threads kimi platformalarda mərhələli olaraq görünməyə başlayacaq bu yeni sistemdə istifadəçilər, başqalarının yazdığı məlumatlara qeydlər əlavə edərək səhv və ya yanıltıcı olduğunu düşündükləri məlumatları şərh edə biləcəklər. Lakin bu qeydlərə heç bir xəbərdarlıq və ya cəza tətbiq edilməyəcək, bu da yalan məlumatların yayılmasını daha da artırma ehtimalını doğurur.

Mark Zukerberq bu dəyişiklikləri açıqlayarkən söz azadlığını və daha geniş müzakirə imkanlarını vurğulayıb. Zukerberq bildirib ki, seçkilər zamanı söz azadlığı daha da ön plana çıxıb və indi istifadəçilər daha sərbəst şəkildə fikirlərini paylaşa bilərlər. 

Fakt yoxlama xidmətinin dayandırılması ilə bağlı ən böyük narahatlıq, saxta məlumatların yayılmasının sürətlənməsidir. Məsələn, Facebook-da bir səhifə saxta məlumat yayaraq, "ICE" (ABŞ Miqrasiya və Gömrük Təşkilatı) tərəfindən sənədsiz miqrantları xəbərdar edənlərə 750 dollar ödəyəcəyini bildirmiş və bunu "faydalı" məlumat kimi təqdim edib. Bu cür məlumatlar əvvəlki fakt yoxlama sisteminin müdaxiləsi ilə asanlıqla yoxlanıb və dayandırılıb, lakin yeni sistemdə bu cür yanlış məlumatların sürətlə yayılması mümkündür.

Ekspertlər bildirir ki, yalnız istifadəçilərin qeydlərinə əsaslanan nəzarət sistemi yalan məlumatlarla mübarizədə kifayət etməyəcək və bu, geniş miqyasda yanlış və manipulyativ məlumatların artmasına yol açacaq. Bu dəyişikliklər, sosial media platformalarında yalan məlumatların və nifrət nitqinin yayılmasına daha çox şərait yarada bilər.