AZNET

ABŞ-ın Microsoft korporasiyası onu patent hüquqlarını pozulmaqda ittiham edən InterDigital şirkəti ilə aparılan məhkəmə dinləmələrində qalib gəlib.

Xeberler.az RYTN-in rəsmi saytına istinadən məlumat verir ki,cümə günü ABŞ Beynəlxalq Ticarət Komissiyası məhkəmənin bir müddət əvvəl InterDigital-ın patentləşdirdiyi texnologiyaların Microsoft tərəfindən mobil telefon istehsalı prosesində icazəsiz istifadəsinə görə cəzalandırılması ilə bağlı çıxarılan qərarını rədd edib.

Mənzil-qərargahı Delaver ştatında yerləşən InterDigital 20 mindən çox müxtəlif texnologiya patentinə malik olmaqla onların dünyanın yüksək texnologiyalı şirkətləri üçün lisenziyalaşdırılmasını təklif edir. 

2007-ci ildə InterDigital ABŞ Beynəlxalq Ticarət Komissiyasına müraciət edərək Finlandiyanın Nokia mobil telefon istehsalçısını iki patent hüququnu pozmaqda ittiham edib. Onlardan biri smartfonlarda səsin gücünün tənzimlənməsinə aid olub. Ötən il ABŞ istehsalçısı Nokia-nın mobil telefon istehsalı bölməsini satın almasına görə InterDigital tərəfindən irəli sürülən bütün iddialar Microsoft-a şamil edilib.

2015-ci ilin aprelində komissiya tərəfindən təyin edilən hakim Teodor Esseks irəli sürülən ittihamları əsaslı sayaraq Microsoft məhsullarının ABŞ ərazisinə idxalının qadağan edilməsi ilə bağlı ilkin qərar çıxarıb. Lakin qərarın sonradan bütün komissiya üzvləri tərəfindən təsdiq edilməsi tələb olunurdu. Onlar cümə günü bir araya gələrək əvvəl çıxarılan qərarı ləğv ediblər.

Xeberler.az