TELEKOM VƏ NƏQLİYYAT

Naxçıvan Muxtar Respublikasında 2020-2021-ci illərin payız-qış mövsümünə hazırlıqla bağlı Kəngərli Rayon Rabitə İdarəsi tərəfindən sakinlərə kəsintisiz rabitə və internet xidmətlərinin göstərilməsi məqsədilə ATS-lərdə istismar olunan qurğulara, o cümlədən, generatorlara, akkumulyatorlara və xətt təsərrüfatına texniki baxış keçirilir, aşkar olunan müxtəlif tutumlu yararsız kabel və dayaqların yeniləri ilə əvəz olunur.

Xeberler.az bildirir ki, Naxçıvan Muxtar Respublikası Rabitə və Yeni Texnologiyalar Nazirliyindən verilən məlumata görə, qurum tərəfindən avtomat telefon stansiyalarında müasir texnologiyalar tətbiq etməklə genişzolaqlı internet xidmətlərinin əhatə dairəsinin genişləndirilməsi, göstərilən xidmətlərin keyfiyyətinin artırılması istiqamətində işlər aparılır.

Həyata keçirilən tədbirlərin davamı olaraq Naxçıvan Mərkəzi ATS-də xüsusi avadanlıq quraşdırılıb ki, bu da Kəngərli rayonunda internetin sürətinin, həmçinin abonent sayının artımına xidmət edəcək. Hazırda aparılan tədbirlərin davamı olaraq Qıvraq qəsəbəsində Kəngərli Rayon Rabitə Evinin yeni inzibati binası inşa olunur.

Nazirlikdən bildirilib ki, cari ilin doqquz ayında rayon ərazisində 88 yeni sabit şəbəkə telefon xətti çəkilib, 384 abonent geniş internetlə təmin olunub. İstismar müddəti ərzində rabitə və abunə qurğularında yaranan nasazlıqların aradan qaldırılması istiqamətində operativ və zəruri tədbirlər həyata keçirilib, sıradan çıxan avadanlıqlar yeniləri ilə əvəz olunub.