TƏDBİRLƏR

Rabitə və Yüksək Texnologiyalar Nazirliyində (RYTN) ABŞ-Azərbaycan Ticarət Palatasının (AmCham) həmsədrləri Bill Delahunt və Reza Vəziri, USACC-ın Fəxri Müşavirlər Şurasının üzvü Jon Sununu ilə görüş keçirilib.

Nazilikdən Xeberler.az-a verilən məlumata görə,görüşdə 20 illik yubiley münasibətilə USACC-ı və onun timsalında təşkilatın üzvü olan bütün şirkətləri təbrik edən rabitə və yüksək texnologiyalar naziri vəzifəsinin müvəqqəti icraçısı, nazirin birinci müavini İltimas Məmmədov ABŞ-Azərbaycan Ticarət Palatası ilə RYTN arasında qurulan əməkdaşlıqdan danışıb.

Bu illər ərzində birgə fəaliyyətin qarşılıqlı töhfə verdiyini deyən İltimas Məmmədov bəzi layihələrdən, o cümlədən ABŞ-ın texnoloji yönümlü ali təhsil müəssisələri ilə qurulan münasibətlərdən söz açıb.

Xüsusən RYTN-in tabeliyində yaradılan Yüksək Texnologiyalar Parkında Texnologiya Sahibkarlığı Mərkəzinin Massaçusets İnstitutunun təsisçisi və icraçı direktoru, ABŞ İnnovasiya və Sahibkarliq Komitəsinin Ekspertlər Şurasının üzvü Ken Morsun iştirakı ilə təlimlərin təşkili və bu təlimlərin sahibkar və digər iştirakçılar tərəfindən müsbət qarşılandığı qeyd edilib, gələcəkdə də bu istiqamətdə əməkdaşlığın genişləndirilməsinin nəzərdə tutulduğu vurğulanıb.

Çıxış edən həmsədrlər Bill Delahunt və Reza Vəziri də birgə fəaliyyəti yüksək dəyərləndirərək, indiyə qədər görülən işlərdə USACC-a  verdiyi dəstəyə görə Rabitə və Yüksək Texnologiyalar Nazirliyinə minnətdarlıqlarını ifadə ediblər.

 Xeberler.az