TƏDBİRLƏR

2023-cü illə müqayisədə 2024-cü ildə SOAR sistemi üzrə alınan xəbərdarlıqların (alerts) sayında təxminən 2 dəfə artım müşahidə olunub.

Xeberler.az Azərtaca istinadən məlumat verir ki, bu sözləri Xüsusi Rabitə və İnformasiya Təhlükəsizliyi Dövlət Xidmətinin baş idarə rəisinin müavini Tural Məmmədov Naxçıvanda keçirilən "Kibersuverenlik" konfransında deyib.

O qeyd edib ki, statistikaya nəzər salsaq, 2024-cü ildə kiberhücum cəhdlərinin analizi nəticəsində 1069 xüsusi kiberhücum indikatoru müəyyən edilərək, "AzStateNet" şəbəkəsində və dövlət e-poçt sistemində bloklamaqla xüsusi hədəflənmiş, APT kiberhücumların qarşısı alınıb.

Tural Məmmədov 2023-cü illə müqayisədə 2024-cü ildə SOAR sistemi üzrə alınan xəbərdarlıqların (alerts) sayında təxminən 2 dəfə artım müşahidə olunduğunu bildirib: "Belə ki, hesabat dövründə SIEM sistemində 333 milyarddan çox loq emal olunub. SOAR sisteminə ötürülən xəbərdarlıqların orta günlük sayı 5520 olub. Bununla yanaşı, Xidmətin həyata keçirdiyi kibertəhdid kəşfiyyatı nəticəsində dövlət qurumlarının informasiya sistemlərinin adlarına bənzədilmiş 110 saxta domen müəyyən edilərək, onların ölkə üzrə fəaliyyətimi dayandırılaraq potensial kiberhücum cəhdləri qabaqlanıb".

Xüsusi Rabitə və İnformasiya Təhlükəsizliyi Dövlət Xidmətinin baş idarə rəisinin müavini vurğulayıb ki, ümumilikdə, texnologiyanın sürətlə inkişaf etdiyi informasiya təhlükəsizliyi məhsullarının hər gün yeniləndiyi bir dünyada yeni milli məhsullar ortaya qoymaq çox çətindir: “Daha çətini isə, “hansı məhsulları milliləşdirməkdən başlamalıyıq” sualına cavab tapmaqdır. Amma düşünürəm ki, kibersüverenliyimizin təmin edilməsi üçün əvvəlcə əlimizdə olan resursların auditi, monitoriniqi və yoxlanılması kimi imkanların genişləndirilməsindən başlamaq ən doğru yanaşma olardı. Məhz bu səbəbdən hazırda 2 istiqamət üzrə laboratoriya qururuq, bunlardan biri Bakı Ali Neft Məktəbində qurulmasını başa çatdırmaq üzrə olduğumuz İnformasiya Təhlükəsizliyi Testləri laboratoriyasıdır. Hansı ki, həm milli həllərin, həm təchiz olunmuş həllərin yoxlanılmasını, laborator testlərini həyata keçirəcək, o cümlədən bu sahədə kadr yetişdirəcək laboratoriya funksiyasını daşıyacaq.

Digəri isə Azərbaycan Texniki Universitetində qurulan Zərərverici Analizi Laboratoriyasıdır ki, o da ölkəmizi hədəf alan xüsusi zərərvericilərin analizini həyata keçirməklə yanaşı, həm də zərərverici analizi üçün hazırda üzərində işlədiyimiz milli sandbox proqram təminatının hazırlanması və dəstəyini həyata keçirəcək. Məlumat üçün qeyd edim ki, Xidmətimizin Zərərverici Analizi Laboratoriyasının bir sıra həlləri artıq istifadəyə verilmişdir. Onlar barədə məlumatları https://mrl.cert.gov.az/  informasiya ehtiyatından məlumat əldə edə bilərsiniz”.