İNTERNET BANK VƏ FİNTEX

ABB 26 may 2026-cı il tarixində istiqraz emissiyasının növbəti mərhələsinə start verib. Bu mərhələdə bank kapital bazarına 5-ci və 6-cı buraxılış olmaqla iki yeni istiqraz çıxarır. Hər buraxılışın həcmi 5 000 000 AZN, ümumi emissiya məbləği 10 000 000 AZN-dir.

İstiqrazların nominal dəyəri 100 AZN, valyutası AZN-dir. 5-ci buraxılış üzrə illik kupon dərəcəsi 9%, 6-cı buraxılış üzrə isə 10% müəyyən edilib. Müddətlər müvafiq olaraq 12 və 24 aydır. Hər iki emissiya faizli, təmin edilməmiş istiqrazlar kateqoriyasına aiddir.

Kupon ödənişləri bu dəfə rüblük deyil, aylıq əsasda həyata keçiriləcək. Emissiya abunə yazılışı formatında aparılır. Yerləşdirmə prosesi 22 gün davam edəcək.

Prosesdə anderrayter və market-meyker funksiyalarını “ABB İnvest İnvestisiya Şirkəti” QSC həyata keçirir.

ABB bu emissiya ilə kapital bazarında davamlı aktivliyi dəstəkləməyi, investorlar üçün mütəmadi və əlçatan investisiya imkanları yaratmağı hədəfləyir.

Qeyd edək ki, bankın may ayında həyata keçirdiyi əvvəlki istiqraz emissiyası da uğurla tamamlanıb. Ümumilikdə 10 milyon AZN həcmində buraxılış tam yerləşdirilib və yüksək investor marağı nəticəsində sifarişlərin həcmi təklifi təxminən 3 dəfə üstələyib.

ABB-nin planlaşdırdığı növbəti istiqraz emissiyaları üzrə cədvəllə buradan tanış ola bilərsiniz. Yeni emissiyalar elan edildikcə dəqiq tarixlər səhifədə göstəriləcək.

ABB-nin müasir, faydalı və universal məhsul və xidmətləri barədə ətraflı məlumatı Bankın filial və şöbələrindən, ABB-nin rəsmi internet səhifəsi, 937 nömrəli Məlumat Mərkəzindən, həmçinin Bankın rəsmi sosial şəbəkə səhifələrindən əldə etmək mümkündür.