TƏHLİL VƏ RƏYLƏR

Azərbaycanda təhsildə süni intellektin tətbiqi istiqamətində yeni mərhələ başlayır. “Rəqəmsal məktəb” platforması artıq AI əsaslı təhsil ekosisteminə çevrilməkdədir.

Xeberler.az məlumat verir ki, bu barədə Azərbaycan İnternet Forumunun prezidenti, ekspert Osman Gündüz sosial media paylaşımında bildirib.

Ekspert qeyd edib ki, müəllimlər artıq tədris prosesində real olaraq süni intellekt alətlərindən istifadə etməyə başlayıblar. Onun sözlərinə görə, Elm və Təhsil Nazirliyi son dövrlər süni intellektin praktik tətbiqi baxımından ölkədə ən sistemli çalışan dövlət qurumlarından birinə çevrilib.

Osman Gündüz bildirib ki, “Rəqəmsal məktəb” platforması üzərindən müəllim, şagird, valideyn və məktəb rəhbərliyi üçün AI əsaslı müxtəlif rəqəmsal xidmətlər formalaşdırılır.

Platformada müəllim və şagirdlər üçün təqdim olunan alətlər sırasında Google şirkətinin Gemini və NotebookLM platformaları da yer alır. Bu alətlər dərs planlarının hazırlanması, mövzuların izahı, test və tapşırıqların yaradılması, həmçinin müəllim materialları əsasında fərdiləşdirilmiş resursların hazırlanmasına imkan yaradır.

Bundan əlavə, Google Classroom, Docs, Forms, Drive və Meet kimi xidmətlər vasitəsilə tədris və idarəetmə prosesləri vahid mühitdə təşkil olunur.

Ekspertin sözlərinə görə, Microsoft Copilot platforması da müəllimlər üçün lokallaşdırılıb və kurikulum əsaslı AI köməkçisi kimi istifadəyə verilib. Sistem müəllimlərə qiymətləndirmə, test, rubrika və metodik materialların hazırlanmasında dəstək göstərir.

Paylaşımda qeyd olunub ki, Presight və G42 ilə əməkdaşlıq çərçivəsində müəllimlər üçün xüsusi “Rəqəmsal Köməkçi” AI agenti də hazırlanıb. Osman Gündüz bu sistemi test etdiyini və onun lokal təhsil sisteminə uyğunlaşdırılmış peşəkar AI dəstək modeli olduğunu bildirib.

Ekspert hesab edir ki, “Rəqəmsal məktəb” platformasında müəllim üçün AI köməkçisi, şagird üçün fərdiləşdirilmiş öyrənmə, valideyn üçün şəffaf monitorinq, məktəb rəhbərliyi üçün isə analitika və idarəetmə imkanlarının yaradılması ölkədə təhsil sahəsində mühüm yenilikdir.

O vurğulayıb ki, Elm və Təhsil Nazirliyi və Təhsil Sisteminin İnformasiyalaşdırılması İdarəsi platformanı davamlı inkişaf etdirə və AI modellərini təkmilləşdirə bilsə, Azərbaycanda milli AI əsaslı böyük təhsil platforması formalaşa bilər.

Osman Gündüz Elm və Təhsil Nazirliyinin süni intellektin təhsildə tətbiqi istiqamətində atdığı praktik addımları təqdirəlayiq hesab edib.