Rusiyanı tərk edən PayPal Ukraynaya gəldi
Qlobal ödəniş sistemi olan PayPal artıq Ukraynada tam funksionallığı ilə fəaliyyətə başladığını açıqlayıb.
Xeberler.az bildirir ki, indiyədək PayPal bu ölkədə qismən fəaliyyət göstərirdi. İstifadəçilər yalnız internetdə bəzi xidmətləri və ya malları almaq üçün ödəniş edə bilirdilər.
İndi isə ukraynalılar PayPal vasitəsilə ödənişləri qəbul edə və bu sistemə inteqrasiya olunan kartlar vasitəsilə pul köçürə biləcəklər.
PayPal Ukrayna üçün bu xidmətdən istifadə ilə bağlı rüsumları da sıfırlayıb. 30 iyun tarixədək əhali bu xidmətdən pulsuz istifadə edə biləcəklər.
Qeyd edək ki, bir müddət öncə Ukraynanın Rəqəmsal Transformasiya naziri PayPal-ın Ukraynada tam funksionallığı ilə bağlı fəaliyyətinin təmin edilməsi haqqında bu qurumun rəhbərliyinə müraciət ünvanlamışdı.
Rusiyanın Ukraynaya təcavüzü ilə bağlı PayPal, həmçinin Xoom, Wise və Remitly ödəniş sistemləri də Rusiyada fəaliyyətlərini dayandırıblar.
