MÜSAHİBƏ

Artıq Google Pay ilə sadəcə kartla təmas olmadan, daha rahat və effektiv ödəniş imkanı qazanırıq.

Xeberler.az bildirir ki, bununla bağlı Azərbaycan İnternet Forumunun Prezidenti, ekspert Osman Gündüz öz feysbuk səhifəsində paylaşım edib.

“Əvvəl kartla ödəyirdik, indi mobil telefon aparatının özü ilə və ya "ağıllı saat" la ödəyəcəyik. Hansı ki, kart öncədən bir dəfə Google Wallet cüzdanına əlavə edilməlidir. Yəni, əvvəl kartı POS terminala yaxınlaşdırmaqla ödəniş edilirdisə, indi mobil telefonun və ya "ağıllı saatın" özünü ödəniş terminalına yaxınlaşdırıb ödəniş etmək mümkün olacaq. Həmçinin onlayn ödənişləri daha rahat formada, hansısa formalar doldurulmadan, qeydiyyatdan keçmədən də reallaşdırmaq olacaq. Həm də , təmassız ödəniş zamanı internetin olması da əhəmiyyət kəsb etmir.

Sadəcə, bəzi məhdudiyyətlər var, gərək kartı verən bank Google Pay-i dəstəkləsin, telefon NFC texnologiyanı dəstəkləsin və xidməti təqdim edən də bu tip ödənişi dəstəkləsin. Əlbəttə, bu addım gec də olsa ölkəmizdə rəqəmsal transformasiyada irəliyə doğru bir addımdır. Təmassız ödənişlər infrastrukturunun inkişafı texnoloji inkişaf göstəricisinin bir tərkib hissəsidir. Bununla da ölkədə nağdsız, təmassız ödənişlərin xüsusi çəkisi kəskin şəkildə artacaq.

Bu istiqamətdə Mərkəzi Bankın səyləri təqdirəlayiqdir. Bununla belə Mərkəzi Bankdan gözləntilər daha çoxdur :

1. Bütövlükdə bank-maliyyə sektorun rəqəmsal transformasiyasına şərait yaradan, az qala 10 ildir ki müzakirəsi gedən "Ödəniş sistemləri və ödəniş xidmətləri haqqında qanun layihəsini" ortaya çıxarmaq.

2. Rəqəmsal manat layihəsini reallaşdırmaq.

3. Qlobal ödəniş sistemlərinə inteqrasiyada mühüm rol oynayan PayPal ödəniş sistemini Azərbaycana gətirmək.

4. Ölkədə mövcud olan yüksək bank komissiyaları, nəqdləşdirmə məhdudiyyətləri və rüsumları, mənasız limitləri ləğv etmək və s".