TƏDBİRLƏR

Bu gün Respublika fənn olimpiadalarının final mərhələsi qaliblərinin mükafatlandırılması mərasimi keçirilib.

Tədbirdə təhsil naziri Mikayıl Cabbarov ali məktəb rektorları, millət vəkilləri, nazirliyin struktur bölmə rəhbərləri, təhsil ekspertləri, məktəb direktorları, qabaqcıl müəllimlər, valideynlər, şagirdlər və media nümayəndələri iştirak edib.

Nazir Mikayıl Cabbarov ümumtəhsil məktəblərinin şagirdləri arasında Respublika fənn olimpiadasının keçirilməsinin onların müxtəlif fənlərə marağının artırılması, istedadlı məktəblilərin aşkara çıxarılması baxımından yüksək dəyərləndirib.

Nazir Azərbaycan Respublikasında təhsilin inkişafı üzrə dövlət strategiyasının istedadlı uşaqların inkişafına yönəlmiş bir sıra mühüm hədəfləri özündə əks etdirdiyini vurğulayıb.

Azərbaycan təhsilinin hərtərəfli inkişafının daim dövlətin diqqət mərkəzində olduğunu söyləyən təhsil naziri əsası ulu öndər Heydər Əliyev tərəfindən qoyulmuş siyasətin bu gün ölkə prezidenti cənab İlham Əliyevin rəhbərliyi altında uğurla davam etdirildiyini vurğulayıb.

Mikayıl Cabarov həmçinin Heydər Əliyev Fondunun prezidenti Mehriban Əliyevanın bu istiqamətdə həyata keçirdiyi davamlı layihələrin müstəsna əhəmiyyət daşıdığını nəzərə çatdırıb. Təhsil naziri qeyd edib ki, fənn olimpiadalarının final mərhələsində Azərbaycanın 58 müxtəlif şəhər və rayon məktəblərindən 450 şagird iştirak edib.

Bu il fənn olimpiadalarının keçirilməsi bir sıra yeniliklərlə müşayiət olunub. İlk dəfə olaraq 3 mərhələdə keçirilmiş fənn olimpiadalarının bir rayon( şəhər mərhələsində) 8 fənn üzrə 22 min şagird iştirak edib. 3700 şagirdin iştirakı ilə bu ildən ilk dəfə olaraq keçirilmiş yarımfinal mərhələsi Bakı, Sumqayıt, Gəncə, Şirvan, Şəki, Mingəçevir, Lənkəran, Şamaxı, Ağdaş, Xaçmaz və Naxçıvanda yerləşən 11 mərkəzdə təşkil olunub.

Final mərhələsində iştirak edən şagirdlərdən 240 nəfərin mükafatçılar arasına daxil olduğunu nəzərə çatdıran nazir qaliblər arasından beynəlxalq fənn olimpiadalarında iştirak edəcək namizədlərin seçiləcəyinə diqqət çəkib. Çıxışının sonunda təhsil naziri orta məktəb şagirdlərinin olimpiadalara xüsusi hazırlıq mərhələsinin keçməsinin vacibliyini nəzərə çatdırıb və belə möhtəşəm bilik yarışının təşkilində zəhməti olan hər kəsə təşəkkürünü bildirib.

Daha sonra çıxış edənlər məqsədyönlü dövlət siyasəti sahəsində Azərbaycan təhsilinin uğurlarının ilbəil artdığını vurğulayıb. Bütün bu nailiyyətlərin Təhsil Nazirliyinin səmərəli fəaliyyəti nəticəsində qazanıldığı bildirilib.

Respublika fənn olimpiadalarında bu il ilk dəfə olaraq iştirakçılar arasından hər fənn üzrə "birincilərin birincisi" nominasiyası üzrə qalib müəyyən edilib və olimpiada fənləri sırasına coğrafiya da əlavə olunub. Eləcə də əvvəlki illərdən fərqli olaraq yoxlamada şəffaflığı və ədalətli qiymətləndirməni təmin etmək üçün olimpiada sualları ilkin mərhələdə açıq şəkildə deyil, test sınağı formasında tətbiq olunub. Həmçinin olimpiada iştirakçılarını bilik yarışına tam motivasiya etmək üçün onların tədbirin keçirildiyi 3 gün ərzində Kempinski Badamdar otelində qalması təmin olunub və imtahandan kənar asudə vaxtın səmərəli təşkili üçün hər cür şərait yaradılıb. Fənn olimpiadalarının keçirildiyi gün nəticələr elan olunub və Təhsil Nazirliyinin rəsmi İnternet saytına (edu.gov.az) və Facebook səhifəsində yerləşdirilib.

Daha sonra Respublika fənn olimpiadalarının final mərhələsində birinci, ikinci və üçüncü yeri tutan şagirdlərə diplom və medallar təqdim olunub. Təhsil Nazirliyi tərəfindən qaliblərə qiymətli hədiyyələr təqdim edilib.

Mirvari Nəcəf