Fənn olimpiadalarına hazırlıq necə gedir?

04-12-2015 / 11:42

Son iki ildə Təhsil Nazirliyi (TN) tərəfindən fənn olimpiadalarının keçirilməsi istiqamətində edilən yeniliklər müzakirə olunub.

Xeberler.az bildirir ki, şəffaflıq və sağlam rəqabət prinsipi əsasında keçirilən olimpiadalar istedadlı uşaqların aşkar edilməsinə, onların fərdi inkişafına və fənlərə olan marağının artırılmasına xidmət edir.

Təhsil Nazirliyi beynəlxalq fənn olimpiadalarına hazırlıq məqsədilə Fizika-riyaziyyat və informatika, eləcə də Kimya-biologiya təmayüllü liseylərin nəzdində fənn olimpiadalarına hazırlıq mərkəzləri yaradıb. Hazırlıq mərkəzlərində qruplar üzrə həftədə iki dəfə olmaqla məşğələlərin keçirilməsinə başlanıb.

Hazırda VII-VIII sinif şagirdləri arasında bir neçə mərhələdən ibarət fənn müsabiqələri keçirilir. Artıq bu müsabiqələrin I mərhələsi başa çatıb. Müsabiqələrin I mərhələsində ölkəmizin əksər bölgələrinin təmsil olunmasına baxmayaraq, Abşeron, Cəbrayıl, Xocavənd, Laçın və Zəngilan rayonlarından şagirdlər iştirak etməyib.

Təhsil Nazirliyinin Təhsilin inkişafı proqramları şöbəsinin müdiri Emin Əmrullayev və həmin şöbənin aparıcı məsləhətçisi Fuad Qarayevlə Respublika fənn olimpiadalarının keçirilməsi, olimpiadalara hazırlıq mərkəzlərinin fəaliyyəti və qeyd olunan rayonların müvafiq müsabiqədə iştirak etməməsi məsələləri müzakirə olunub.

Nazirliyin təhsilin inkişafı proqramları şöbəsinin aparıcı məsləhətçisi Fuad Qarayev bildirib ki, əvvəlki illərə nisbətən fənn müsabiqələrində şəffaflığı təmin etmək üçün müsabiqənin artıq test üsulu ilə keçirilməsinə başlanıb.

“Təhsil Nazirliyi tərəfindən bu il fənn müsabiqələrinin nəticələrinin fərqli deyil, bir mərkəzdən yoxlanılması üstün tutuldu. Belə ki, müsabiqə ilk mərhələdə test üsulu ilə keçirildi. Bundan əlavə əvvəki illərə nisbətən şagirdlərə öz yazılarını müdafiə etməyə imkan verdik. Belə ki, müsabiqədən bir gün sonra onlar üçün apelyasiya günü elan etdik. Onlara imtahan gününün axşamı həm internet səhifəmizdə, həm də imtahan keçirilən salonlarda imtahanın nəticələrini elan etdik. Bununla da nəticə ilə razılaşmayan şagirdlərə öz yazılarını müdafiə etməyə imkan yaratdıq”.

Fuad Qarayev eyni zamanda keçən il keçirilən olimpiadalarda əldə olunan medallar barədə də məlumat verib.

Onun sözlərinə görə, riyaziyyat fənni üzrə 2 bürünc medal, kimya fənni üzrə 2 bürünc medal, fizika fənni üzrə 1 bürünc medal, biologiya fənni üzrə 1 bürünc medal, Balkan olimpiadasında 3 bürünc, 1 gümüş medal qazanılıb.

Xatırladaq ki, bu il 26 iyul - 2 avqustda Qazaxıstanın Almatı şəhərində keçirilən 27-ci Beynəlxalq İnformatika Olimpiadasında iştirak edən Azərbaycan Milli Komandası heç bir medal qazanmamışdı.

 

Ruhəngiz Muradova

 


ŞƏRHLƏR






sorğu
İT mütəxəssislər iş yerlərini hansı meyarlar əsasında seçir ?
  • Şirkətin yüksək statusuna görə
  • İşin, layihənin xarakterinə görə
  • Əmək müqaviləsinin olmasına görə
  • Yüksək əmək haqqına, mükafatlara və digər güzəştlərə görə
  • Gələcək karyerası üçün əhəmiyyət kəsb etdiyinə görə
  • Maraqlı, işgüzar kollektivə görə