İKT REGİON

Sabirabad rayonunda STEAM təhsilinin inkişafı gənclərin müasir dövrün tələblərinə uyğun bilik və bacarıqlara yiyələnməsində mühüm rol oynayır. Elm, texnologiya, mühəndislik, incəsənət və riyaziyyatı birləşdirən STEAM yanaşması gənclərdə tənqidi düşünmə, analitik təhlil, problem həll etmə və innovativ yanaşma bacarıqlarının formalaşmasına şərait yaradır.

Xeberler.az bildirir ki, bu məqsədlə Sabirabad Gənclər Evi Sabirabad rayonunda fəaliyyət göstərən Sabirabad STEAM Mərkəzi ilə sıx əməkdaşlıq edir. Əməkdaşlığın əsas məqsədi region gənclərini texnologiya ilə yaxından tanış etmək, onların potensialını üzə çıxarmaq və inkişafını dəstəkləməkdir.

Sabirabad Gənclər Evinin təşəbbüsü ilə Sabirabad STEAM Mərkəzinə təşkil olunan infotur bu istiqamətdə atılan mühüm addımlardan biri olub. İnfotur çərçivəsində Sabirabad Gənclər Evinin rəhbərliyi və könüllülərdən ibarət komanda mərkəzin fəaliyyəti ilə yaxından tanış olub.

Görüş zamanı Sabirabad Gənclər Evinin direktoru Rəşad Qurbanov çıxış edərək müasir dövrdə texnoloji savadlılığın xüsusi əhəmiyyət daşıdığını vurğulayıb və gənclərin gələcək karyeralarını qurarkən STEAM mərkəzlərinin təqdim etdiyi imkanlardan maksimum faydalanmasının vacibliyini qeyd edib.

Daha sonra STEAM Mərkəzinin koordinatoru Kənan Səmədov və mərkəzin əməkdaşı Subra Yəhyayeva iştirakçılara burada həyata keçirilən fəaliyyətlər barədə ətraflı məlumat veriblər. Gənclərə robototexnika, 3D modelləşdirmə, mühəndislik istiqamətləri və müxtəlif STEM layihələri əyani şəkildə nümayiş etdirilib. İştirakçılar müasir laboratoriya avadanlıqları ilə tanış olub, praktiki prosesləri izləmək və suallarını birbaşa mütəxəssislərə ünvanlamaq imkanı qazanıblar.

Qeyd olunub ki, STEAM təhsili Sabirabad gəncləri üçün yalnız texniki biliklərin əldə edilməsi deyil, eyni zamanda yaradıcı düşüncənin inkişafı, ideyaların real layihələrə çevrilməsi və gələcək peşə seçiminin düzgün istiqamətdə formalaşması baxımından da böyük əhəmiyyət kəsb edir. Bu prosesdə Sabirabad Gənclər Evi gənclərlə texnoloji imkanlar arasında körpü rolunu oynayaraq onların maariflənməsinə və motivasiyasına töhfə verir.

İnteraktiv müzakirə şəraitində keçən görüş iştirakçılar tərəfindən maraqla qarşılanıb. İnfotur gənclərin texnologiya sahəsinə marağının daha da artmasına səbəb olub.