RƏQƏMSAL DÜNYA

Bildirdiyimiz kimi, fevralın 23-də STEAM İnnovasiya Mərkəzinə infotur təşkil olunub. İnfoturda media qurumlarının rəhbərləri, tanınmış ictimaiyyət nümayəndələri və KİV təmsilçiləri iştirak ediblər. 

Xeberler.az bildirir ki, bununla bağlı Azərbaycan İnternet Forumunun Prezidenti, ekspert Osman Gündüz öz feysbuk səhifəsində paylaşım edib.

“Yeni fəaliyyətə başlayan STEAM İnnovasiya Mərkəzində olduq. Mərkəz Elm və Təhsil Nazirliyi tərəfindən “STEAM Azərbaycan” layihəsi çərçivəsində yaradılıb. Uşaqlar, məktəblilər və tələbələr üçün nəzərdə tutulan texnoloji bir mərkəzdir. Uşaqların texnologiyaları daha dərindən mənimsəməsi, praktiki vərdişlər qazanması üçün , biliyin təcrübədə tətbiqi üçün unikal bir məkandır. Elə Mərkəzin əsas üstünlüyü də məhz öyrənilənlərin təcrübədə tətbiqi imkanı, daha maraqlı və cəlbedici formada bilik və bacarıqlar əldə imkanı yaratmasıdır.

Burada hər şey var, aviasiya məkanı, simulyasiya mərkəzi, konstruksiya, robotların hazırlanması laboratoriyası, “İlluziyalar və fiziki eksponatlar”, “Virtual reallıq”, “Sadə proqramlaşdırma”, oyun otaqları, “3D hologram”, VR zonaları və s. mövcuddur. Yəni, burada uşaqlar həyatda qarşılaşdıqları hansısa bir real problemlərin həlli üçün daha yaradıcı yanaşma sərgiləməyə, məsələlərin daha effektiv həll yollarını   tapmağa imkan qazanırlar

Mərkəzdən istifadənin uşaqlar və məktəblər üçün hansı formada, pullu, yoxsa pulsuz olacağı hələlik müəyyənləşməyib. Həmçinin qurumun gələcək statusu da hələlik qeyri-müəyyəndir. Növbəti ayda bu məsələlərin həlli nəzərdə tutulub.

Düşünürəm ki, hələlik bu tip mərkəz ölkədə yeganə olduğundan Nazirlik onun statusunu müəyyən edərkən daha geniş təbəqə üçün əlçatan olması prinsipini əsas götürməsi doğru olardı”.