TEXNOLOGİYA

Naxçıvandakı STEAM Təlim-Tədris Mərkəzi yaxın günlərdə istifadəyə veriləcək.

Xeberler.az məlumat verir ki, bu günədək muxtar respublikanın 113 ümumtəhsil məktəbində STEAM kabinələri yaradılaraq zəruri avadanlıqlarla təmin olunub.

Bu sahədə həyata keçirilən tədbirlər nəticəsində 22 minə yaxın şagird STEAM təhsilinə cəlb olunub.

STEAM təhsil metodunun daha geniş tətbiqi məqsədilə Naxçıvan şəhərində STEAM Təlim-Tədris Mərkəzi də yaradılıb. Yaxın günlərdə şagirdlərin istifadəsinə veriləcək mərkəzin binası üçmərtəbəlidir. Mərkəzdə müasir dizaynda mühəndis emalatxanası, 3D printer, dron uçuş, elm, informatika, incəsənət və texnologiya, təlim, robotexnika, kimya-biologiya otaqları yaradılıb. Mərkəzdə xidməti otaqlar və layihələrin nümayişi üçün sərgi salonu da yaradılıb. Mərkəz zəruri avadanlıqlarla, müxtəlif modellərdə və ölçülərdə 3D printer, CNC-lazer, tədris əsaslı robotlar və elektron komponentlər, emalatxana və tədris ləvazimatları, elektron lövhə və kompüterlə təmin olunub.

Mərkəzdə Təhsil Nazirliyinin Tədbirlər Planına əsasən ilk mərhələdə məktəblərdə təhsil alan istedadlı və bacarıqlı şagirdlərdən ibarət şagird bankı yaradılacaq. STEAM dərslərinin tədrisi üçün 2 illik dərs proqramları hazırlanacaq. Daha sonra proqrama uyğun olaraq şagirdlər həftənin 6 günü dərsdən sonra mərkəzə cəlb ediləcək. STEAM dərsləri 3D çap, microbit və arduino ilə proqramlaşdırma, elektrik mühəndisliyi, robotexnika, CNC lazer kəsiciləri, tədris dronları üçün hazırlanmış tədris proqramı üzrə təşkil olunacaq. Burada şagirdlər həm proqram əsasında, həm də öz ideyaları ilə texnoloji layihələr reallaşdıra biləcək, elmi araşdırmalar aparacaq, prototiplər yaradacaq, robot modelləri quracaq və onları məhsula çevirəcəklər. Tədris layihəsi ilkin olaraq 6 və 7-ci sinifləri əhatə edəcəkdir