SOSİAL MEDIA

ABŞ Prezidenti Donald Tramp cümə axşamı günü imzaladığı sərəncamla Çin şirkəti “TikTok”un ABŞ-dakı əməliyyatlarını Amerika və beynəlxalq investorlara satmaq planının 2024-cü il qanunu çərçivəsində milli təhlükəsizlik tələblərinə cavab verəcəyini bəyan edib.

Xeberler.az Reutersə istinadən məlumat verir ki, vitse-prezident Cey Di Vens yeni Amerika şirkətinin təqribən 14 milyard dollar dəyərində qiymətləndiriləcəyini və bu məbləğin bəzi analitiklərin hesablamalarından xeyli aşağı olacağını bildirib.

Cümə axşamı Donald Tramp “TikTok”un Amerika aktivlərini qlobal platformadan ayırmaq, amerikalı və digər investorları cəlb etmək və Çin hökumətinin təsdiqini almaq səyləri fonunda çinli sahiblərin onu satmayacağı təqdirdə bu tətbiqi qadağan edən qanunun icrasını yanvarın 20-dək təxirə salıb.

Sərəncamın imzalanması göstərir ki, Tramp “TikTok”un Amerika aktivlərini satmaqda irəliləyiş əldə edir, lakin Amerika qurumunun bu sosial şəbəkənin ən vacib aktivindən – onun tövsiyə alqoritmindən necə istifadə edəcəyi də daxil olmaqla, çoxsaylı təfərrüat hələ aydınlaşdırılmalıdır. ABŞ Prezidentinin sərəncamında deyilir ki, alqoritm Amerika təhlükəsizlik şirkətinin tərəfdaşları tərəfindən yenidən hazırlanacaq və ona nəzarət ediləcək. Bundan başqa, alqoritmin işinə yeni birgə müəssisə nəzarət edəcək.

Donald Tramp bildirib ki, Çinin Sədri Si Cinpin bu planları təsdiqləyib. “Mən prezident Cinpin ilə danışdım. Yaxşı söhbətimiz oldu, ona planlarımızdan bəhs etdim, o da “ irəli gedək” dedi”, -dəyə ABŞ Prezidenti əlavə edib.

ABŞ Prezidenti qeyd edib ki, Birləşmiş Ştatlarda 170 milyon istifadəçisi olan “TikTok” keçən il ona yenidən seçilməkdə kömək edib. Onun şəxsi “TikTok” hesabında 15 milyon izləyici var. Ağ Ev də keçən ay rəsmi “TikTok” hesabını istifadəyə verib. “Bütün bunlar tamamilə amerikalılar tərəfindən idarə olunacaq”, -deyə o vurğulayıb.

“TikTok”un çinli ana şirkəti “ByteDance” öz əməkdaşları tərəfindən səhmlərin satın alınması üzrə yeni planına əsasən, hazırda özünü 330 milyard dollardan çox qiymətləndirir. Şirkətin özünün ümumi gəlirdə payı da azdır.