KOSMOS

Türkiyə peyk texnologiyaları və kommunikasiya sahəsində bəyan etdiyi hədəflərə yaxınlaşır.

Xeberler.az Azərtaca istinadən məlumat verir ki, bunu Türkiyə Prezidenti Rəcəb Tayyib Ərdoğan Ankaranın Gölbaşı bölgəsində ilk yerli kommunikasiya peyki olan “Türksat 6A”nın istifadəyə verilməsi mərasimində çıxışı zamanı bildirib.

Dövlət başçısı qeyd edib ki, “Türksat 6A” peyki 2024-cü il iyulun 9-da Yer orbitinə çıxarılıb və peykdən ilk test yayımları bu ilin fevralın 17-də həyata keçirilib. “Peykin test prosesi problemsiz şəkildə plan üzrə həyata keçirilib”, – deyə Prezident bildirib və “Türksat 6A” layihəsində iştirak edən bütün mütəxəssislərə təşəkkürünü ifadə edib.

Dövlət başçısı bildirib ki, yerli istehsal olan bu kommunikasiya peykinin istismar müddəti ən azı 15 il olacaq. “Sevindirici haldır ki, “Türksat” şirkətinin idarə etdiyi peyklərin sayı altıya çatıb, ümumilikdə isə Türkiyənin Yer orbitində 10 aktiv peyki var”, – deyə o qeyd edib.

Ərdoğan “Türksat 6A” peykini “Türkiyənin fasiləsiz televiziya yayımının təmin olunmasında həyati əhəmiyyətə malik mərhələ” adlandırıb. “Xarici mütəxəssislər və şirkətlərin iştirakı olmadan yerli peyklərin hazırlanması Türkiyənin milli təhlükəsizliyi baxımından çox önəmlidir. Hazırda ölkəmiz dünyada öz kommunikasiya peyklərini hazırlaya bilən 11 ölkədən biridir”, – deyə Prezident vurğulayıb və “Türksat 6A”nın komponentlərinin 80 faizindən çoxunun Türkiyədə istehsal edildiyini qeyd edib.

Dövlət başçısı əlavə edib ki, artıq “Türksat” peyklərinin əhatə dairəsinə Hindistan, Tailand, Malayziya və İndoneziya da daxildir. “Türk peyklərinin əhatə etdiyi əhalinin sayı 3,5 milyarddan 5 milyard nəfərə yüksəlib”, – deyə o bildirib.

Türkiyə Prezidenti xatırladıb ki, ölkənin ilk peyki olan TÜRKSAT 1B 31 il əvvəl orbitə çıxarılmışdı, “Türksat 6A” isə Türkiyə mühəndisliyinin uğurunun sübutudur.