TƏDBİRLƏR

“İnformasiya Texnologiyaları Akademiyası” layihəsi davam edir. Layihə çərçivəsində növbəti treninqlər Azərbaycanın şimal-qərb rayonlarında – Zaqatala və Balakəndə keçirilir.“İrəli” İctimai Birliyi tərəfindən həyata keçirilən proqramın məqsədi gənclərin maarifləndirilməsi və əhalinin gənc təbəqəsinin informasiya ilə təmin olunmasıdır. Qeyd edək ki, layihəyə birbaşa dəstək Azərbaycan Rabitə və İnformasiya Texnologiyaları Nazirliyi tərəfindən təqdim olunur.

Layihənin açılış mərasimi hər iki rayonda dünən təşkil olunub. Tədbirə rayonların İcra Hakimiyyətinin, Yeni Azərbaycan Partiyasının, “İrəli” Gənclər Birliyinin nümayəndələri, eləcədə layihənin gələcək iştirakçıları qatılıblar.Xatırladaq ki, ilk dəfə “İnformasiya Texnologiyaları Akademiyası” layihəsinin təqdimat mərasimi Gəncə şəhərində keçirilmişdir. Respublikanın bütün regionlarını əhatə edəcək proqram tədricən icra olunacaq.

Layihə artıq Gəncə, Qazax, Ağstafa, Şəmkir və Tovuzda reallaşdırılıb. Gəncədə təşkil olunan kursların 270 iştirakçısından 188 nəfəri sertifikat əldə edib. Qazaxda 135 iştirakçıdan 106-sına, Ağstafada isə 134 iştirakçıdan 86-sına  xüsusi sertifikatlar verilib. Şəmkirdə keçirilmiş təlimlərdə iştirak etmiş 130 nəfərdən 102 nəfərə, Tovuzda isə 135 nəfərdən 88 nəfərə sertifikatlar verilib.İl ərzində müəllimlərin, yeniyetmələrin və gənclərin kompüter və internet sahəsi üzrə maarifləndirilmək, regionlarda bu istiqamətdə başlanğıc biliklər formalaşdırılmaq və “informasiya texnologiyaları qruplarını” yaratmaqla layihəyə 50 min insan cəlb olunacaq.Layihənin ilkin aidiyyəti auditoriyası kompüter biliklərinə malik olmayan gənclərdir.